విశాఖలో పులివెందుల రాజకీయాలు చేస్తున్నారు : చంద్రబాబు

ఏపీకి ప్రత్యేక హోదా కోరుతూ అక్కడి యువత, రాజకీయ పార్టీలు వైజాగ్ ఆర్కే బీచ్‌లో తలపెట్టిన నిరసన ప్రదర్శనను అడ్డుకున్న ఏపీ పోలీసులు, ప్రభుత్వంపై ప్రతిపక్షాలు విమర్శలు చేసిన అనంతరం గురువారం రాత్రి 11 గంటలకి వైజాగ్‌లో ఏపీ సీఎం చంద్రబాబు మీడియాతో మాట్లాడారు.

వైజాగ్‌లో పెట్టుబడులు వచ్చే సమయంలో రౌడీయిజం చేసేందుకు కుట్ర జరుగుతోంది. పెట్టుబడుల సదస్సులో ఏపీకి 927 ప్రాజెక్టులు సాధించుకున్నాం. కొత్తగా విశాఖకు వచ్చే పెట్టుబడులతో 9 లక్షల మందికి ఉపాధి లభిస్తుంది. ఈ నగరం కోసం నేను ఎంతో చేశాను. హుద్ హుద్ తుపానులో అస్తవ్యస్తమైన విశాఖ నగరాన్ని తిరిగి 8 రోజుల్లో సాధారణ స్థితికి తీసుకువచ్చాను. నగరానికి ఓ బ్రాండ్ ఇమేజ్ వచ్చేలా కృషి చేశాను. అందుకే ఈ నగరాన్ని చూసి నేనెంతో గర్వపడుతున్నాను.

ఇటువంటి సమయంలో విపక్షాలు చేస్తున్న ఆందోళన పెట్టుబడులపై ప్రభావం చూపించే ప్రమాదం ఉంది. ఇప్పటికే పారిశ్రామికవేత్తలు జైళ్లకు వెళ్లిన చెడ్డపేరు ఈ రాష్ట్రాన్ని వెంటాడుతోంది. ఇంకోవైపు ఉగ్రవాదులు దేశంలో అస్థిరత సృష్టించడానికి ప్రయత్నిస్తున్నారు. ఈ రౌడీయిజంతో వచ్చే పెట్టుబడులు వెనక్కిపోయేలా కుట్ర జరుగుతోంది" అని ఆవేదన వ్యక్తంచేశారు బాబు.

ప్రత్యేక హోదా కోసం చంద్రబాబు ఏమీ చేయలేదు అని నాపై విమర్శలు చేస్తున్నారు. కానీ 14వ ఆర్థిక సంఘమే ప్రత్యేక హోదాను నిరాకరించింది. అయినా ప్రత్యేక హోదాకన్నా ఎక్కువ మేలు కలగడం కోసం ప్రత్యేక ప్యాకేజీకి ఒప్పుకున్నాం. కానీ కొంతమంది అదేమీ పట్టించుకోకుండా ఈ విశాఖలో పులివెందుల రాజకీయాలు చేస్తున్నారు. విపక్షాల తీరుని ప్రజలే గమనించాలి. నేరాలు, ఘోరాలు జరుగుతాయనే ఉద్దేశంతోనే వైఎస్సార్ భార్యను విశాఖలో జనం గెలిపించుకోలేదు. రాజకీయాలతో రాష్ట్రంలో వెలుగులు నింపాలి కానీ ప్రజల్లో ఆందోళన కలిగించరాదు అని అభిప్రాయపడ్డారు చంద్రబాబు.