గాంధీ ఆస్పత్రిలో ఎమ్మెల్యే భార్యకు చేదు అనుభవం!

సామాన్యలకు ప్ర‌భుత్వాసుప‌త్రుల్లో ఎన్ని ఇబ్బందులు ఎదురవుతాయో తెలిపేలా సికింద్రాబాద్‌ గాంధీ ఆస్పత్రిలో జరిగిన ఓ సంఘ‌ట‌న వెలుగులోకి వచ్చింది. అధికారా పార్టీకి చెందిన ఓ ఎమ్మెల్యే భార్య పేషెంట్‌ను తీసుకొని ప్ర‌భుత్వాసుప‌త్రికి వ‌చ్చింది. ఆమె ఎవ‌రో తెలిసుండి కూడా తీసుకొచ్చిన పేషెంట్ ప‌ట్ల అక్క‌డి సిబ్బంది నిర్ల‌క్ష్యంగా వ్య‌వ‌హ‌రించారు. తనతోపాటు వచ్చిన పేషెంట్‌ను ఎవ్వరూ పట్టించుకోకపోవడంతో ఆమే స్వయంగా వీల్‌ఛైర్‌ తీసుకొచ్చి అతడిని కూర్చోబెట్టి లోనికి తీసుకెళ్లారు.

ఓ ఎమ్మెల్యే భార్య‌ను కూడా ఆస్పత్రి సిబ్బంది పట్టించుకోక‌పోతే ఇక సామాన్యుడి పరిస్థితి ఎలా ఉంటుందో అర్థం చేసుకోవచ్చని జనాలు అంటున్నారు. దుబ్బాక ఎమ్మెల్యే రామలింగారెడ్డి భార్య సుజాత తన సోదరుడి కుమారుడిని చికిత్స కోసం ఆస్పత్రికి తీసుకొచ్చారు. గాంధీ ఆస్పత్రి సిబ్బంది ఎవరూ పట్టించుకోకుండా వ్యవహరించిన తీరుపై విమర్శలు వెల్లువెత్తుతున్నాయి. సిబ్బంది నిర్వాకంతో ఆమెకు ఈ అనుభ‌వం ఎదురైంది. ఈ ఘ‌ట‌న‌పై ఇప్ప‌టివ‌ర‌కు గాంధీ ఆస్పత్రి అధికారులు, సిబ్బంది స్పందించలేదు. ఒకప్పుడు తన సేవలతో తెలుగు రాష్ట్రాల్లో మంచి పేరు సంపాదించిన గాంధీ ఆస్పత్రి ప్రతిష్ఠ ఇటీవల కాలంలో మసకబారుతోంది.