వీడియో: ఉస్మానియాలోకి వరద నీరు.. రోగుల అవస్థలు

హైదరాబాద్ నగరంలో కురుస్తోన్న భారీ వర్షాల కారణంగా ఉస్మానియా ఆసుపత్రిలో పాత భవనంలో వరద నీరు వచ్చి చేరింది. మంగళవారం సాయంత్రం నుంచి భారీ వర్షం పడటంతో.. హాస్పిటల్ ప్రాంగణంలోకి భారీ వరద చేరింది. పై కప్పు నుంచి నీరు లీకవడం, వరద నీరు చేరడంతో.. రోగులు తీవ్ర ఇబ్బందులు పడ్డారు. వర్షం నీటిలోనే నడిచి వెళ్తూ.. డాక్టర్లను సంప్రదించారు. అసలే అనారోగ్యం, ఆపై వరద కష్టాలతో రోగులు తీవ్ర అవస్థలకు గురయ్యారు.

ఉస్మానియా ఆసుపత్రి భవనం శిథిలావస్థకు చేరడంతో రోగులు, డాక్టర్లు బిక్కు బిక్కుమని గడుపుతున్నారు. పై కప్పు పెచ్చులు ఊడిపడుతుండటంతో... ఉస్మానియా డాక్టర్లు ఇటీవలే హెల్మెట్ ధరించి వైద్య సేవలు అందించారు. అంతకు ముందు ఔట్ పేషెంట్లకు చెట్ల కింద వైద్య సేవలు అందించారు. ఆస్పత్రి భవనం శిథిలావస్థకు చేరినా.. ప్రభుత్వం ఎలాంటి చర్యలు చేపట్టకపోవడం దారుణమని జూనియర్ డాక్టర్లు ఆవేదన వ్యక్తం చేశారు.