Bhima Koregaon Case: వరవరరావు మరో నాలుగు వారాల పాటు హౌస్ అరెస్ట్

భీమా కొరేగావ్ హింస కేసుతో సంబంధాలున్నాయన్న అభియోగంపై ఆగస్టు 28న అరెస్టయిన ఐదుగురు పౌరహక్కుల నేతల గృహనిర్బంధాన్ని మరో నాలుగు వారాల పాటు పొడిగిస్తూ సుప్రీం కోర్టు శుక్రవారం తీర్పు వెల్లడించింది. దీంతో విరసం నేత వరవరరావు గృహనిర్బంధం మరో నాలుగు వారాల పాటు పొడిగించినట్లయింది. ఈ ఐదుగురి అరెస్టుకు రాజకీయ అభిప్రాయాలపై విభేదాలు కారణం కాదని సుప్రీంకోర్టు పేర్కొంది. అరెస్టులకు దురుద్దేశాలు ఆపాదించలేమని తెలిపింది. విరసం నేత వరవర రావు, న్యాయవాది సుధా భరద్వాజ్, పౌరహక్కుల నేతలు వెర్నన్ గొనెసాల్వేన్, అరుణ్ ఫెరీరా, గౌతమ్ నవ్‌లఖాల అరెస్టు విషయంలో జోక్యానికి అత్యున్నత న్యాయస్థానం నిరాకరించింది. ఈ మేరకు చీఫ్ జస్టిస్ దీపక్ మిశ్రా సారథ్యంలోని సుప్రీం బెంచ్ తేల్చి చెప్పింది.

ఈ కేసులో సిట్ దర్యాప్తు జరిపించాలన్న పిటిషనర్ల డిమాండ్‌ను సుప్రీం కోర్టు తోసిపుచ్చింది. ఈ ఐదుగురి అరెస్ట్‌పై స్వతంత్ర దర్యాప్తు జరపాలని, సిట్‌ వేయాలని, వారిని తక్షణమే విడుదల చేయాలని ప్రముఖ చరిత్రకారిణి రోమిలా థాపర్‌, ఆర్థిక వేత్తలు ప్రభాత్‌ పట్నాయక్‌, దేవకి జైన్‌, సోషియాలజీ ప్రొఫెసర్‌ సతీష్‌ దేశ్‌పాండే తదితరులు పిటిషన్లు దాఖలు చేశారు. అయితే దీనికి ధర్మాసనం అంగీకరించలేదు.

అలాగే ఈ కేసు దర్యాప్తును కొనసాగించడానకి పుణె పోలీసులకు అత్యున్నత ధర్మాసనం అనుమతి ఇచ్చింది. అరెస్టయిన నేతలు ఉపశమనం కోసం విచారణ కోర్టుకు వెళ్లవచ్చని కూడా తెలిపింది. మావోయిస్టులతో సంబంధాలున్నాయన్న ఆరోపణలపై ఆగస్టు 28న విరసం నేత వరవరరావును పుణె పోలీసులు అరెస్టు చేసిన విషయం తెలిసిందే. హైదరాబాద్‌లోని వరవరరావు ఇంటికి వెళ్లి, ఆయన్ను ప్రశ్నించి మరీ అరెస్టు చేశారు. అదే రోజు వెర్నన్ గొనెసాల్వేన్, సుధా భరద్వాజ్, అరుణ్ ఫెరీరా, గౌతమ్ నవ్‌లఖాలను కూడా పుణె పోలీసులు అరెస్ట్ చేశారు. ప్రస్తుతం వీరంతా కోర్టు ఆదేశాల మేరకు గృహనిర్బంధంలో ఉన్నారు. కాగా, సుప్రీం కోర్టు నుంచి ఈ తీర్పును ఊహించలేదని వరవరరావు భార్య హేమలత అన్నారు. పిటిషన్ ఫైల్ చేయడానికి సహకరించిన సుప్రీం కోర్టు న్యాయవాదులకు ఆమె ధన్యవాదాలు తెలిపారు. నాలుగు వారాల తరవాత హైకోర్టుకు వెళ్తామని చెప్పారు.