రోడ్లు ఊడ్చి గిన్నీస్ రికార్డ్

రోడ్లు ఊడిస్తే గిన్నీస్ రికార్డ్ సాధ్యమవుతుందా... సాధ్యమేనని నిరూపించింది జీహెచ్ఎంసీ. స్వచ్ఛ్ సర్వేక్షణ్‌లో భాగంగా ఏర్పాటు చేసిన కార్యక్రమంతో సరికొత్త రికార్డును సొంతం చేసుకుంది మన హైదరాబాద్. బాగ్‌లింగంపల్లిలో చేపట్టిన స్వచ్ఛ్ సర్వేక్షణ్‌లో దాదాపు 15వేలమంది విద్యార్థులు భాగస్వాములయ్యారు. వీరంతా మూడు నిమిషాలు పాటు చీపురు పట్టి రోడ్లు ఊడ్చారు. ఈ కార్యక్రమం ఆజామాబాద్‌లోని వీఎస్టీ చౌరస్తా నుంచి ఆర్టీసీ కళాభవన్, డాక్టర్ బీ.ఆర్. అంబేద్కర్ కాలేజీ మీదుగా సుందరయ్య పార్క్ మెయిన్ రోడ్డు వరకు సాగింది. మంత్రులు కేటీఆర్, మహమూద్ అలీ, నాయిని, తలసానిలు కూడా హాజరయ్యారు.

గతంలో గుజరాత్‌లోని వడోదరలో జరిగిన కార్యక్రమంలో 5058మంది పాల్గొన్ని రెండు నిమిషాలు పాటు రోడ్లను ఊడ్చి రికార్డు సృష్టించారు. 15వేలమంది పాల్గొనడంతో... ఆ రికార్డును అధిగమనించారు. రాంగనర్ డివిజన్‌లోని 26 స్కూళ్ల నుంచి 8వేల500మంది ... ఆరు కాలేజీ నుంచి 2వేలమంది విద్యార్థులతో పాటు... 600మంది టీచర్లు, 800మంది వాలంటీర్లు, మరో 3వేలమంది ప్రజలు పాల్గొన్నారు. కొత్త రికార్డును హైదరాబాద్ సొంతం చేసుకోవడంపై మంత్రులు ఆనందాన్ని వ్యక్తం చేశారు. నగరాన్ని పరిశుభ్రంగా ఉంచే బాధ్యత ప్రతి నగరవాసిపై ఉందని... స్వచ్ఛ్ భారత్‌లోనూ నగరాన్ని నెంబర్ వన్‌గా నిలబెట్టేందుకు కృషి చేయాలన్నారు.