అమిత్ షా నుంచి పరిపూర్ణానందకు పిలుపు

శ్రీరాముడిపై సినీ విమర్శకుడు కత్తి మహేష్ అనుచిత వ్యాఖ్యలు చేయడం, దాన్ని స్వామి పరిపూర్ణానంద తీవ్రంగా ఖండించడం మనందరికీ తెలిసిందే. ఈ వివాదం కాస్త ముదరడంతో హైదరాబాద్ నగర శాంతి భద్రతలను దృష్టిలో పెట్టుకుని పోలీసులు వీరిద్దరినీ నగర బహిష్కరణ చేశారు. అయితే పరిపూర్ణానందను నగర బహిష్కరణ చేయడాన్ని బీజేపీ తీవ్రంగా వ్యతిరేకించింది. పరిపూర్ణానందకు బీజేపీ అండగా నిలిచింది. దీంతో ఈ వివాదం రాజకీయ రంగు పులుముకుంది.

మరోవైపు, పరిపూర్ణానందను ఆరు నెలలపాటు నగరం నుంచి బహిష్కరిస్తూ నిర్ణయం తీసుకున్న పోలీసులకు హైకోర్టు షాకిచ్చింది. స్వామీజీపై నగర బహిష్కరణను హైకోర్టు ఎత్తివేయడంతో కిందటి నెల ఆయన హైదరాబాద్ వచ్చారు. అయితే అప్పటి నుంచి ఓ ప్రచారం ఊపందుకుంది. పరిపూర్ణానంద బీజేపీలో చేరుతున్నారని, తెలంగాణకు ఆయన మరో యోగి ఆదిత్యనాథ్ కానున్నారని ప్రచారం జరుగుతోంది. ఆయన కూడా రాజకీయాల్లోకి వస్తున్నట్లు సూచన ప్రాయంగా చెప్పారు. కానీ ఏ పార్టీలో చేరతారనేది స్పష్టంగా చెప్పలేదు. అయితే తాజాగా ఆయనకు బీజేపీ నుంచి పిలుపు వచ్చినట్లు తెలుస్తోంది.

See Video: స్వామి పరిపూర్ణానంద ఎక్స్‌క్లూజివ్ ఇంటర్వ్యూ

బీజేపీ జాతీయ అధ్యక్షుడు అమిత్ షా నుంచి పరిపూర్ణానందకు ఆహ్వానం అందిందని విశ్వసనీయ సమాచారం. రేపు (అక్టోబర్ 7న) ఉదయం స్వామీజీ ఢిల్లీకి బయలుదేరి వెళతారని తెలుస్తోంది. తెలంగాణలో ఎన్నికల నగారా మోగిన ఈ సమయంలో పరిపూర్ణానందకు బీజేపీ అధిష్టానం నుంచి పిలుపు రావడం ప్రాధాన్యత సంతరించుకుంది. పరిపూర్ణానందను తెలంగాణ బీజేపీ సీఎం అభ్యర్థిగా ప్రకటించనున్నారనే వార్త గత కొద్ది కాలంగా వినిపిస్తోంది. మరోవైపు ఆయనకు హైదరాబాద్ ఎంపీ సీటు ఇస్తారనే ప్రచారం కూడా జరుగుతోంది. మరి వీటిలో నిజమెంత, వచ్చే శాసనసభ ఎన్నికల్లో ఆయన పోటీ చేస్తారా వంటి విషయాలు తెలియాలంటే కాస్త ఆగాల్సిందే!