పాదయాత్రలో జగన్‌ను కలవనున్న స్టార్‌హీరో?

వైఎస్సార్ కాంగ్రెస్ పార్టీ అధినేత, ఏపీ ప్రతిపక్ష నేత వైఎస్ జగన్ మోహన్ రెడ్డి చేపట్టిన ప్రజా సంకల్పయాత్రలో ఒక స్టార్ హీరో పాల్గొననున్నాడా? పాదయాత్రలో ఉన్న జగన్ ను కలిసి.. మద్దతుగా నిలవనున్నాడా? అతడు మరెవరో కాదు.. తమిళ స్టార్ హీరో సూర్య. జగన్ తో తన సాన్నిహిత్యాన్ని ఇటీవలే వివరించి చెప్పిన సూర్య.. పాదయాత్రలో ఉన్న ఆయనను కలవనున్నట్టుగా ప్రచారం జరుగుతోంది. తన తాజా సినిమా ‘గ్యాంగ్’ ప్రమోషన్ తో బిజీగా ఉన్న సూర్య.. త్వరలోనే జగన్ ను కలవబోతున్నట్టుగా సమాచారం.

ప్రజాసమస్యలను తెలుసుకోవడానికి, ప్రజలతో మమేకం కావడానికి జగన్ పాదయాత్ర చేపట్టడం అభినందనీయం అని ఇటీవలే సూర్య వ్యాఖ్యానించారు. అందుకు సంబంధించిన వీడియోలు సోషల్ మీడియాలో అగుపిస్తున్నాయి. జగన్ పట్ల సూర్య సానుకూలంగా మాట్లాడటం, జగన్ ను సూర్య ‘అన్న’ అని సంబోధించడం.. వైఎస్సార్ కాంగ్రెస్ పార్టీ వాళ్లకు ఉత్సాహాన్ని ఇస్తోంది. ఈ నేపథ్యంలో ఈ హీరో జగన్ ను కలవబోతున్నాడనే వార్త వైకాపా అభిమానులకు మరింత ఉత్సాహాన్ని ఇచ్చే అంశంగా మారుతోంది.

ప్రస్తుతం చిత్తూరు జిల్లాలో జగన్ పాదయాత్ర సాగుతోంది. ఈ జిల్లాలో జగన్ పాదయాత్ర దాదాపు ముగింపు దశకు వచ్చింది. చిత్తూరు అనంతరం జగన్ నెల్లూరు జిల్లాలో పాదయాత్రను కొనసాగించనున్నారు. సూళ్లురుపేట నియోజకవర్గంతో జగన్ పాదయాత్ర నెల్లూరు జిల్లాలోకి ప్రవేశిస్తుందని సమాచారం. ఈ నెల 21తర్వాత ఎఫ్పుడైనా జగన్ పాదయాత్ర నెల్లూరు జిల్లాలో మొదలవుతుందని వైకాపా ప్రకటించింది. ఆ జిల్లాలోని ఎనిమిది నియోజకవర్గాల మీదుగా ప్రజాసంకల్పయాత్ర సాగుతుంది.