జగన్ పాదయాత్రకు టీడీపీ నేత ప్రశంసలు!

ఒకవైపు ప్రతిపక్ష నేత వైఎస్ జగన్ మోహన్ రెడ్డి చేపట్టిన ప్రజాసంకల్ప పాదయాత్రపై తెలుగుదేశం పార్టీ నేతలు విమర్శల వాన కురిపిస్తూ ఉన్నారు. జగన్ మోహన్ రెడ్డి పాదయాత్ర మొదలైన దగ్గర నుంచి ఏపీ మంత్రుల, టీడీపీ ముఖ్యనేతల విమర్శలు కొనసాగుతూ ఉన్నాయి. అయితే ఇదే సమయంలో ఒక టీడీపీ నేత మాత్రం జగన్ పాదయాత్రను ప్రశంసించడం గమనార్హం. జగన్ పాదయాత్రపై తెలుగుదేశం పార్టీ విరుచుకుపడుతున్నా.. పాదయాత్రను స్వాగతిస్తూ జగన్ ను ప్రశంసించిన ఆ నేత మరెవరో కాదు.. రాజంపేట మాజీ ఎంపీ, కేంద్రమంత్రి సాయిప్రతాప్.

గతంలో కాంగ్రెస్ పార్టీ లో పని చేసిన సాయిప్రతాప్ కొన్నాళ్ల కిందట తెలుగుదేశంలో చేరారు. తెలుగుదేశం పార్టీలోనే కొనసాగుతూ ఉన్నారు. అయితే ఆయన అనూహ్యంగా జగన్ ను ప్రశంసించారు.

‘జగన్ ఒక డైనమిక్ లీడర్, అనునిత్యం ప్రజల్లో ఉండటానికి తగినట్టుగా జగన్ పాదయాత్ర చేపట్టాడు.. ’ అని సాయిప్రతాప్ వ్యాఖ్యానించారు. ప్రతిపక్ష నేత పాదయాత్ర పట్ల ఒక తెలుగుదేశం నేత ఇలా స్పందించడం విశేషమే కదా. సాయిప్రతాప్ మాటలపై కొంతమంది తెలుగుదేశం నేతలు అభ్యంతరం వ్యక్తం చేస్తున్నారు. ఈ విషయంలో ముఖ్యమంత్రి చంద్రబాబుకు ఫిర్యాదు చేసే పనిలో పడ్డారట తెలుగుదేశం నేతలు.