ఏపీలో పీడీ అకౌంట్స్ రగడ.. ఎంపీ జీవీఎల్‌కు టీడీపీ నేతల సవాల్

ఏపీలో పీడీ అకౌంట్స్ వ్యవహారం పొలిటికల్ హీట్ పెంచుతోంది. పీడీ అకౌంట్ల పేరుతో కుంభకోణం జరిగిందంటూ ఆరోపిస్తున్న ఏపీ బీజేపీ నేతలు.. విజయవాడలో గవర్నర్‌ నరసింహన్‌ను కలిసి ఫిర్యాదు చేశారు. బీజేపీ నేతలు అలా గవర్నర్‌కు ఫిర్యాదు చేశారో లేదో.. టీడీపీ నుంచి ఇలా కౌంటర్లు మొదలయ్యాయి. కుంభకోణం జరిగిందంటూ మొదటి నుంచి ఆరోపణలు చేస్తున్న బీజేపీ ఎంపీ జీవీఎల్‌ నరసింహారావుపై ఆ పార్టీ నేతలు మండిపడ్డారు.

పీడీ అకౌంట్ల‌పై బహిరంగ చర్చకు జీవీఎల్ సిద్ధమా అని ప్రశ్నించారు టీడీపీ ఎంపీ సీఎం రమేష్. ఇందులో అవినీతిని నిరూపిస్తే ఏ శిక్షకైనా సిద్ధమని.. నిరూపించలేకపోతే జీవీఎల్ ఏం చేస్తారో చెప్పాలని సవాల్ విసిరారు. సీబీఐతో విచారణ చేయించాలంటున్న బీజేపీ నేతలు.. దానికి టీడీపీ అనుమతి అవసరం లేదన్ని విషయాన్ని గ్రహిస్తే మంచిదన్నారు. రాష్ట్రంలో జరుగుతున్న అభివృద్ధిని చూసి ఓర్వలేకే ఇలాంటి ఆరోపణలు చేస్తున్నారని మండిపడ్డారు.

బీజేపీ, ఎంపీ జీవీఎల్ చేసిన ఆరోపణలపై స్పందించారు ఎమ్మెల్సీ బుద్దా వెంకన్న. పీడీ అకౌంట్లపై బీజేపీ నేతలు గవర్నర్‌ను ఫిర్యాదు చేశారని.. ఆయన సమక్షంలోనే దీనిపై బహిరంగ చర్చకు సిద్దమా అని సవాల్ విసిరారు. అవినీతి జరిగిందని తేలితే తాను రాజీనామా చేస్తానని.. లేని పక్షంలో జీవీఎల్ రాజీనామా చేస్తారా అని ప్రశ్నించారు. జీవీఎల్ చెప్పేవన్నీ పచ్చి అబద్దాలని.. ఒకవేళ ఆయన ఎన్నికల్లో పోటీ చేసినా డిపాజిట్లు కూడా దక్కవన్నారు. చంద్రబాబును అడ్డకోలేకే ఇలాంటి ఆరోపణలు చేస్తున్నారని మండిపడ్డారు.

పీడీ అకౌంట్లపై దుష్ప్రచారం జరుగుతోందన్నారు టీడీపీ ఎమ్మెల్సీ డొక్కా మాణిక్యవరప్రసాద్. ప్రభుత్వంపై ఎంపీ జీవీఎల్ అసత్య ఆరోపణలు చేస్తున్నారని.. దీనిపై కేంద్రం విచారణ జరుపుకోవచ్చన్నారు. ఒకవేళ విచారణకు ఆదేశించినా ఎదుర్కోవడానికి సిద్ధమన్నారు. ప్రతి రాష్ట్రానికి పీడీ అకౌంట్లు ఉండటం సర్వ సాధారణమని.. జీవీఎల్ ఉద్దేశపూర్వకంగానే ఏపీని టార్గెట్ చేశారని విమర్శించారు.