కేంద్ర సాయం అంతంతమాత్రమే: చంద్రబాబు

విభజనతో తీవ్రంగా నష్టపోయిన ఆంధ్రప్రదేశ్ కు విభజన హామీలను నెరవేర్చే విషయంలో కేంద్రం నుండి అస్సలు సహకారమే లేదని తాము చెప్పడం లేదని ముఖ్యమంత్రి చంద్రబాబునాయుడు వ్యాఖ్యానించారు. కేంద్రం సహాయం చేస్తున్న మాట వాస్తవమే కానీ ఆ సాయం అంతంత మాత్రమేనని దాని వల్ల ప్రయోజనం శూన్యమని మంగళవారం నాడు ఏపీ తాత్కాలిక రాజధాని విజయవాడలో జరిగిన తెలుగుదేశం పోలిట్ బ్యూరో సమావేశంలో ఆయన చెప్పారు. తాను లెక్కలేనన్ని సార్లు స్వయంగా ఢిల్లీ వెళ్లి కేంద్రంలోని పెద్దలతో సమావేశమైనా ప్రయోజనం లేకపోయిందన్నారు. ఈ విషయాన్ని తాము తేలికగా వదిలిపెట్టబోమన్నారు.

తిరుపతిలో తెదేపా మహానాడు..

ఇదిలా ఉండగా తెలుగుదేశం పార్టీ మహానాడును తిరుపతిలో మూడు రోజుల పాటు నిర్వహించాలని పార్టీ నిర్ణయించింది. ఈ నెల 27, 28, 29 తేదీల్లో మహానాడును ఘనంగా నిర్వహించాలని తీర్మానించారు. తెలంగాణ నీటి ప్రాజెక్టులు, కేంద్రంతో సత్సంబంధాలు, మహానాడు తీర్మానాలపై కూడా చర్చించారు.