నంద్యాల ఎంఎల్ఏ భూమా నాగిరెడ్డికి తీవ్ర గుండెపోటు

నంద్యాల ఎమ్మెల్యే, తెలుగుదేశం నేత భూమా నాగిరెడ్డికి తీవ్ర గుండెపోటు రావడంతో ఆయనను చికిత్స కోసం ఆళ్లగడ్డ తరలించారు. అయితే ప్రాథమిక చికిత్స అనంతరం మెరుగైన వైద్యం కోసం నాగిరెడ్డిని నంద్యాలకు తరలించారు. 2014 జులైలో భార్య శోభానాగిరెడ్డి కారు ప్రమాదంలో మరణించినప్పుడు కూడా భూమా స్వల్ప గుండెపోటుకు గురయ్యారు. 2014 ఎన్నికల్లో వైఎస్సాఆర్ కాంగ్రెస్ తరఫున నంధ్యాల శాసనసభ నియోజకవర్గం నుంచి ఎంఎల్ఏగా గెలుపొందిన నాగిరెడ్డి 2016లో అధికార తెలుగుదేశం పార్టీలో చేరారు.

నాగిరెడ్డి ఆరోగ్య పరిస్థితి గురించి ఆరా తీసిన ఆంధ్రప్రదేశ్ ముఖ్యమంత్రి చంద్రబాబు నాయుడు కర్నూలు కలెక్టర్‌తో ఫోన్లో మాట్లాడారు. మెరుగైన వైద్యం కోసం తరలించడానికి అవసరమైతే హెలికాప్టర్ వాడాలని సూచించారు.

ఆళ్లగడ్డ ఎంఎల్ఏ, ఆయన కుమార్తె అఖిలప్రియ కూడా తేదేపా తీర్థం పుచ్చుకున్నారు. 2009 వరకు టీడీపీలో కొనసాగిన నాగిరెడ్డి ఆ తర్వాత ప్రజారాజ్యం పార్టీలో చేరి నంద్యాల నుంచి పోటీ చేశారు. ప్రజారాజ్యం పార్టీని కాంగ్రెస్‌లో విలీనం చేయడంతో వైఎస్‌ జగన్మోహన్ రెడ్డి స్థాపించిన వైఎస్సార్ కాంగ్రెస్‌లో చేరారు. భూమా నాగిరెడ్డి గతంలో నంద్యాల పార్లమెంట్ స్థానం నుంచి మూడు సార్లు ఎంపీగా గెలుపొందారు.