పవన్, బీజేపీలపై జలీల్ ఖాన్ సంచలన వ్యాఖ్యలు!

తనను అణగదొక్కడానికి కొన్ని టీవీ చానెళ్లు పనిగట్టుకుని దుష్ప్రచారం చేస్తున్నాయని జనసేన అధినేత, నటుడు పవన్ కల్యాణ్ నిరసన వ్యక్తం చేస్తోన్న విషయం తెలిసిందే. ఇందులో మంత్రి నారా లోకేశ్‌కు కూడా భాగస్వామ్యం ఉందని పవన్ సామాజిక మాధ్యమాల్లో చేసిన ట్వీట్టు కలకలం రేపాయి. పవన్ విమర్శలపై టీడీపీ ఎమ్మెల్యే జలీల్ ఖాన్ సంచలన వ్యాఖ్యలు చేశారు. ప్రజాస్వామ్యంలో మీడియా ముఖ్య పాత్ర పోషిస్తుంది.. అలాంటిది, కొన్ని ఛానళ్లను చూడవద్దని పవన్ కల్యాణ్ ఎలా చెబుతారని ఆయన మండిపడ్డారు. మీకు అనుకూలంగా వార్తలను ప్రసారం చేసిన ఛానళ్లను చూడాలా? మీకు వ్యతిరేకంగా వార్తలను ప్రసారం చేస్తే చూడకూడదా? ఇదెక్కడి విడ్డూరం అని నిలదీశారు.

పవన్ తన తీరు మార్చుకోవాలని సూచించిన జలీల్ ఖాన్, మీ అన్న చిరంజీవి కూడా రాజకీయాల్లోకి వచ్చి కాపులను ముంచేశారని... ఇప్పుడు వారిని మరోసారి ముంచేందుకు మీరు వచ్చారని ఎద్దేవా చేశారు. చంద్రబాబు, లోకేశ్‌లపై ప్రశంసలు కురిపించిన జనసేనాని నిమిషాల్లోనే యూటర్న్ తీసుకుని విమర్శలు మొదలు పెట్టారని ఆగ్రహం వ్యక్తం చేశారు. పవన్ అనుసరించే విధానాలు ప్రజాస్వామ్యంలో మనుగడ సాగించలేవని వ్యాఖ్యానించారు.

మరోవైపు బీజేపీ నేతలపై తీవ్ర పద జాలాన్ని ప్రయోగించారు. చంద్రబాబుపై జఫ్పాల మాదిరిగా మాట్లాడవద్దని బీజేపీ నేతలకు సూచించారు. ఏపీకి తీరని అన్యాయం చేసిన మోదీని వెనకేసుకొచ్చిన బీజేపీ నేతలు, ఏపీ ప్రజల మనోభావాలను దెబ్బతీస్తున్నారని ఆరోపించారు. రాష్ట్రానికి మోదీ అన్యాయం చేస్తున్నారా? లేదా? అనే విషయాన్ని బీజేపీ నేతలు స్పష్టంగా చెప్పాలని డిమాండ్ చేశారు.

మోసం చేస్తున్న ప్రధానిని ప్రశ్నించకుండా... జఫ్పాల్లాగ మోదీని ఇంద్రుడు, చంద్రుడు అని పొగుడుతున్నారని దుయ్యబట్టారు. మోదీ మీకు అధినేత కావచ్చు.. మాకు కాదు.. ఆయన కంటే చంద్రబాబు ఎంతో అనుభవశాలి అని... మోదీకి వంద చెరువుల నీరు తాగించే దమ్ము, ధైర్యం బాబుకు ఉన్నాయని హెచ్చరించారు. మోదీ గురించి బాలయ్య మాట్లాడిన దాంట్లో ఎలాంటి తప్పు లేదని సమర్ధించారు.