మరోసారి నవ్వులు పూయించిన ‘బీకామ్ ఫిజిక్స్’ఎమ్మెల్యే

తాను బీకామ్‌లో ఫిజిక్స్ చదివానంటూ ఓ టెలివిజన్ ఇంటర్వ్యూలో అధికార పార్టీ ఎమ్మెల్యే చేసిన వ్యాఖ్యలు పాపులర్ అయిన విషయం తెలిసింది. అయనపై సోషల్ మీడియాలో పెద్ద చర్చే జరిగింది. మరోవైపు విపక్షాలు కూడా దీన్ని ఒక అస్త్రంగా వాడుకుని ప్రభుత్వంపై విమర్శలకు దిగాయి. ఈ వ్యాఖ్యలతో పాపులర్ అయిన ఆంధ్రప్రదేశ్ టీడీపీ ఎమ్మెల్యే జలీల్ ఖాన్ మరోసారి నవ్వులు పూయించారు. విజయవాడ పశ్చిమ నియోజకవర్గం ఎమ్మెల్యే అయిన జలీల్ ఖాన్ నిన్న ఇఫ్తార్ విందు ఏర్పాటు చేశారు. ఈ విందుకు ముఖ్యమంత్రి చంద్రబాబును కూడా ఆహ్వానించారు. విందుకు విచ్చేసిన చంద్రబాబకు ముస్లిం మత పెద్దలు ఘనంగా స్వాగతం పలికారు. ఆ తర్వాత చంద్రబాబుకు మత పెద్దలను గౌరవించి ఇచ్చే దుస్తులను (టోప్) ధరింప జేశారు. టోప్ ధరించిన చంద్రబాబును చూసి ముస్లింలు మురిసిపోతూ 'జయహో.. జోథా అక్బర్' అంటూ నినాదాలు చేశారు.

ఈ సందర్భంగా జలీల్ ఖాన్ మాట్లాడుతూ ముస్లింలందరూ టీడీపీ వైపే ఉన్నారని అన్నారు. ముస్లింల అభివృద్ధికి ప్రభుత్వం మరింత కృషి చేయాలని కోరారు. పనిలో పనిగా, తన జీవితాన్ని తమరే నిర్ణయించాలని... వేరేవారి చేతుల్లో పెట్టవద్దని చంద్రబాబును ఉద్దేశించి జలీల్ సరదా వ్యాఖ్యలు చేశారు. దీంతో చంద్రబాబు సహా అక్కడున్నవాళ్లంతా సరదాగా నవ్వుకున్నారు. టీడీపీ ఎమ్మెల్యే జలీల్ ఖాన్ బీకామ్ ఫిజిక్స్ వ్యాఖ్యలను సమర్ధించుకున్నారు కూడా. అంతేకాదు తనకు గణితం అంటే చాలా ఇష్టమని అందుకే బీకామ్‌లో ఆ సబ్జెక్టు తీసుకున్నానని తెలిపారు.