40 మంది టీడీపీ ఎమ్మెల్యేలు టచ్‌లో, బాబుకూ తెలుసు: జనసేన

జనసేన ప్లీనరీ సందర్భంగా పవన్ కల్యాణ్ తెలుగు దేశం పార్టీపై తీవ్ర స్థాయిలో గుప్పించారు. చంద్రబాబు ప్రభుత్వం అవినీతిలో కూరుకుపోయిందని విమర్శించారు. మీ అబ్బాయి లోకేశ్ చేసే అవినీతి మీకు తెలుసా? అంటూ ఆయన చంద్రబాబును సూటిగా ప్రశ్నించారు. ప్రభుత్వం అవినీతికి పాల్పడుతోందని 40 మంది టీడీపీ ఎమ్మెల్యేలు తనకు చెప్పారని పవన్ మాట్లాడటం సంచలనమైంది. తెలుగుదేశం పార్టీకి చెందిన 40 మంది ఎమ్మెల్యేలు తనకు చెప్పారని పవన్ యాథాలాపంగా మాట్లాడారా? లేదంటే నిజంగానే ఆయనతో వారు టచ్‌లో ఉన్నారా? అనే చర్చ రాజకీయ వర్గాల్లో మొదలైంది.

అయితే తెలుగుదేశం పార్టీకి చెందిన 40 మంది ఎమ్మెల్యేలు, వారి పిల్లలు మాతో టచ్‌లో ఉన్నారని జనసేన అధికార ప్రతినిధి అద్దేపల్లి శ్రీధర్ చెప్పారు. అంతేకాదు, మాతో ఎవరెవరు టచ్‌లో ఉన్నారో చంద్రబాబుకు కూడా తెలుసంటూ ఆయన సంచలన వ్యాఖ్యలు చేశారు. తెలుగుదేశం పార్టీకి వెన్నుపోటు పొడవలేదని జనసేన అధికార ప్రతినిధులు స్పష్టం చేశారు.

ఏపీ మంత్రి, ముఖ్యమంత్రి తనయుడు నారా లోకేశ్ అవినీతిపై మా దగ్గర ఆధారాలు ఉన్నాయని జనసేన పార్టీ అధికార ప్రతినిధి అద్దేపల్లి శ్రీధర్ స్పష్టం చేశారు. సమయం వచ్చినప్పుడు వాటిని బయటపెడతామని చెప్పారు. లోకేశ్ అవినీతిపై కేంద్రం విచారణ చేపట్టాలని ఆయన డిమాండ్ చేశారు. ఢిల్లీ చెబితే శేఖర్, లోకేశ్ గురించి మాట్లాడారా? అంటే.. ఢిల్లీ దగ్గర మీకు సంబంధించిన ఆధారాలు ఉన్నాయనే కదా అని ఆయన ప్రశ్నించారు.


పవన్‌ను విమర్శించే అర్హత మంత్రులకు లేదన్న శ్రీధర్.. వారు తమ శాఖలపై దృష్టి పెడితే బాగుంటుందన్నారు. టీడీపీ, బీజేపీ, వైసీపీలతో సమదూరం పాటిస్తున్నామన్నారు.

ప్రత్యేక హోదా కోసం రాష్ట్రవ్యాప్తంగా అంబేద్కర్ విగ్రహాల దగ్గర బుధవారం సాయంత్రం 4-5 గంటల మధ్య నల్ల బ్యాడ్జీలతో మౌన ప్రదర్శన చేపడుతున్నామని జనసేన తెలిపింది. ప్యాకేజీ ఇస్తే గతంలో టీడీపీ నేతలు వెంకయ్యను సన్మానించారు. మీరే గతంలో హోదా సంజీవని కాదన్నారని జనసేన గుర్తు చేసింది.