‘జగన్ ఎంతటి తెలివైనవాడు.. ఎంపీలు ఏప్రిల్ 6న రాజీనామా చేస్తారట?’

ప్రజాసమస్యలను ప్రత్యక్షంగా తెలుసుకోడానికి వైసీపీ అధినేత వైఎస్ జగన్మోహన్ రెడ్డి పాదయాత్ర చేస్తోన్న విషయం తెలిసిందే. ప్రస్తుతం ఆయన పాదయాత్ర నెల్లుూరు జిల్లాలో కొనసాగుతోంది. మంగళవారం ఉదయగిరి సభలో ప్రసంగించిన జగన్.. ప్రత్యేక హోదా కోసం పోరాడ‌తామ‌ని, ఏప్రిల్‌ 6న త‌మ లోక్ స‌భ స‌భ్యులు రాజీనామా చేస్తార‌ని ప్రకటించారు. వైసీపీ ఎంపీల రాజీనామా గురించి జ‌గ‌న్ చేసిన ప్రకటనపై టీడీపీ నేతలు ఎదురుదాడి ప్రారంభించారు. దీనిపై అనంతపురం ఎంపీ జేసీ దివాక‌ర్ రెడ్డి విమ‌ర్శ‌లు గుప్పించారు. 'ఏప్రిల్ 6న రాజీనామా చేస్తార‌ట‌, జ‌గ‌న్‌కి ఎంత‌టి తెలివి తేట‌లు చూడండి!' అంటూ వ్యంగ్యాస్త్రాలు సంధించారు.

‘ఎప్పుడో ఏప్రిల్ 6వ తారీఖున ఎంపీలతో రాజీనామా చేస్తాయిరట.. జగన్ చాలా తెలివైనవాడు.. ఏప్రిల్ ఆరున రాజీనామాలు పంపితే వాటి ఆమోదానికి కనీసం రెండు నెలలు పడుతుంది. ఆపై కొద్ది నెల‌ల‌కే జమిలి ఎన్నికలు వస్తాయి. నవంబర్ లేక డిసెంబరులో ఈ జ‌మిలి ఎన్నికలు వస్తాయి.. ఏపీలో పార్లమెంటు స్థానాలకు మళ్లీ ఎన్నికలు ఎందుకని ఎన్నికల కమిషన్ వెనుకడుగు వేసి నవంబర్ లేదా డిసెంబరు వరకు ఆగుతుంది' అని దివాకర్ రెడ్డి ఆరోపణలు గుప్పించారు. రెండేళ్ల కిందట కూడా ప్రత్యేక హోదా కోసం రాజీనామా చేస్తామని జ‌గ‌న్ ప్రకటించారని, ఆయన ఈ రోజు ఓ మాట చెప్పి, కొన్ని రోజుల తరువాత మరో మాట చెబుతారని, ఆయన మాటలను ఎవ్వరూ నమ్మరని ఎద్దేవా చేశారు. వైసీపీ ఎంపీలు రాజీనామా చేయాలనుకుంటే ఈ రోజే రాజీనామా చేయొచ్చుకదా? అని ప్రశ్నించారు.

టీడీపీ ఎమ్మెల్సీ బుద్ధా వెంకన్న మాట్లాడుతూ... ఎంపీల రాజీనామా డ్రామాను మళ్లీ మొదలెట్టారని ఎద్దేవా చేశారు. తన ఎంపీలతో రెండేళ్ల కిందటే రాజీనామా చేయించాల్సిందని, ఇదంతా ఓ నాటకమని పేర్కొన్నారు. రాష్ట్రపతి ఎన్నికల్లో జగన్ మద్దతును బీజేపీ కోరకపోయినా కేంద్ర ప్రభుత్వం అద్భుతంగా పనిచేస్తుందని, తన మద్దతు ఎన్డీఏ అభ్యర్థికేనని ప్రకటించాడని ఆయన తెలిపారు. ఇదంతా తనపై కేసులు మాఫీచేసుకోడానికే వేసిన ఎత్తుగడ అని దుయ్యబట్టారు. ఢిల్లీలో లాలూచి పడి జైలుకు వెళ్లకుండా తప్పించుకోడానికి శతవిధాలుగా ప్రయత్నిస్తున్నారని విమర్శించారు.