చెవిలో పువ్వు.. ఎంపీ శివప్రసాద్ మరో వేషం

మనం నిరసన తెలపాలంటే ఏం చేస్తాం... రోడ్డెక్కుతాం, ర్యాలీ చేస్తాం, ధర్నాకు దిగుతాం, రోడ్లపైనా బైఠాయిస్తాం... ఇలా నిరసనలు తెలిపే మార్గాలు రోజూ మనం చూస్తూనే ఉంటాం. కాని ఆయన మాత్రం అలాకాదు. అందరికంటే కాస్త భిన్నం... ఏదైనా వెరైటీగా చేస్తాడు. సినిమాల్లో కూడా కాస్త టచ్ ఉండటంతో... సమస్య ఏదైనా డిఫరెంట్‌గా వింత, వింత వేషాలతో స్పందించడం ఆయన మ్యానరిజం. ఇంతకీ ఇంత ఉపన్యాసం ఎవరి గురించి అనుకుంటున్నారు. చిత్తూరు ఎంపీ శివ ప్రసాద్ గురించి. రాష్ట్ర విభజన దగ్గరి నుంచి మొన్న కేంద్రం బడ్జెట్‌లో ఏపీకి అన్యాయం చేసిందంటూ ఆయనో ఎన్నో వేషాల్లో నిరసన తెలిపి వార్తల్లో నిలిచారు. ఇప్పుడు సొంత జిల్లాలో కూడా ఆయన మరోసారి వెరైటీగా నిరసన తెలిపి మరోసారి వార్తల్లో నిలిచారు.



శివప్రసాద్‌ తిరుపతిలోని తారకరామా స్టేడియంలో రెండు చెవుల్లో పువ్వులు పెట్టుకొని నిరసన తెలిపారు. గత సార్వత్రిక ఎన్నికల సమయంలో ప్రధాని నరేంద్రమోడి ఈ స్టేడియంలో జరిగిన ఎన్నికల ప్రచారంలో పాల్గొని ఏపీకి కొన్ని హామీలను ప్రకటించారు. ఆ హామీలను మరోసారి గుర్తు చేస్తూ గుర్తు చేస్తూ... ఇలా ఆందోళన చేశారు. టీఎస్ఎన్ఎఫ్ ఆధ్వర్యంలో జరిగిన నిరసన కార్యక్రమంలో ఆయన ఇలా పాల్గొన్నారు. ఏపీకి నరేంద్రమోదీ హామీలు ఇచ్చి పట్టించుకోవడం లేదన్నారు ఎంపీ. హామీలు అమలు చేయకపోతే పుట్టగతులు ఉండవన్నారు. మొత్తానికి చెవిలో పువ్వుతో శివ ప్రసాద్ మరోసారి తన ప్రత్యేకతను చాటుకున్నారు.