ప్రధాని ఎవరో మనమే తేలుద్దాం: చంద్రబాబు

శుక్రవారం తన పుట్టిన రోజు పురస్కరించుకుని చంద్రబాబు నాయుడు ధర్మపోరాట దీక్ష చేపట్టిన సంగతి తెలిసిందే. రాత్రి ఏడు గంటలకు దీక్ష విరమించిన అనంతరం సభను ఉద్దేశించి ప్రసంగించారు. అనంతరం ఆయన మీడియాతో మాట్లాడుతూ పలు కీలక వ్యాఖ్యలు చేశారు. తన దీక్షకు అన్ని వర్గాల ప్రజలు సంఘీభావం తెలిపారని చంద్రబాబు పేర్కొన్నారు.

వచ్చే ఎన్నికల్లో 25 ఎంపీ సీట్లు గెలిపించాలని, భవిష్యత్తులో ప్రధాని ఎవరో మనమే తేలుద్దామని పిలుపునిచ్చారు. వ్యక్తిగత అజెండాతో పనిచేసే పార్టీలను దూరం పెట్టాలని చంద్రబాబు తెలిపారు. ధర్మ పోరాట దీక్ష స్ఫూర్తిదాయకంగా సాగిందన్నారు. రాష్ట్రాన్ని అస్థిర పరచేందుకు బీజేపీ చేస్తున్న ఆపరేషన్ గరుడ‌తో వ్యూహాన్ని పన్నుతుందనే సమాచారంపై చంద్రబాబు పరోక్షంగా స్పందిస్తూ..‘‘కర్ణాటక ఎన్నికల తర్వాత.. ఏపీపై దృష్టిపెడతారన్న వార్తలు వస్తున్నాయి. అయినా నేను వెనక్కి తగ్గే ప్రసక్తేలేదు. దేనికీ భయపడేది లేదు’’ అని అన్నారు.