టీడీపీ, వైఎస్ఆర్సీపీ కార్యకర్తల మధ్య ఘర్షణ

ఏపీలో అధికార మార్పిడి జరుగుతున్న వేళ... టీడీపీ, వైఎస్ఆర్సీపీ శ్రేణుల మధ్య గొడవలు చోటు చేసుకుంటున్నాయి. రాష్ట్రంలోని కొన్ని ప్రాంతాల్లో ఇరు పార్టీల కార్యకర్తలు ఒకరిపై మరొకరు దాడులకు తెగబడుతున్నారు. గుంటూరు జిల్లా దాచేపల్లి మండలం శ్రీనివాసపురంలో టీడీపీ, వైఎస్ఆర్సీపీ వర్గాల మధ్య ఘర్షణ చోటు చేసుకుంది. ఇరు వర్గాలు పరస్పరం కర్రలతో దాడులకు దిగాయి. చేతికి అందిన వాటితో కొట్టుకున్నారు. మహిళలు సైతం ఈ ఘర్షణలో పాల్గొన్నారు.

పరస్పర దాడుల్లో పలువురికి గాయాలయ్యాయి. పోలీసుల రంగ ప్రవేశంతో అక్కడ పరిస్థితి అదుపులోకి వచ్చింది. క్షతగాత్రులను సమీప ఆస్పత్రికి తరలించిన వారు.. గ్రామంలో భారీ బందోబస్త్ ఏర్పాటు చేశారు. మంచినీళ్ల విషయంలో తలెత్తిన వివాదం.. ఒకరిపై మరొకరు దాడి చేసుకునేంత వరకు వెళ్లిందని తెలుస్తోంది.