యూసఫ్‌గూడలో దారుణం.. జువెలరీ షాపులో యువతి హత్య

ఎన్ని చట్టాలు వచ్చినా.. ఎన్ని శిక్షలు విధించినా యువతులపై దాడులు ఆగడంలేదు. తనకు దక్కనిది ఎవరికీ దక్కకూడదనే ఉన్మాదంతో కర్కోటకులుగా మారుతున్న కొందరు యువకులు.. అమ్మాయిలను చంపడానికి వెనకాడటంలేదు. ఇది కూడా అలాంటి ఘటనే. హైదరాబాద్ నగర నడిబొడ్డులో పట్టపగలు ఓ జువెలరీ దుకాణంలోకి చొరబడిన యువకుడు ఓ అమ్మాయిని అత్యంత దారుణంగా గొంతుకోసి చంపేశాడు. అనంతరం అక్కడి నుంచి పరారయ్యాడు. హత్యకు గరైన యువతి పేరు వెంకటలక్ష్మి, వయసు 19 ఏళ్లు.

యూసఫ్‌గూడలోని జవహర్ నగర్‌లో ఉన్న జువెలరీ దుకాణంలో వెంకటలక్ష్మి కొంతకాలంగా పనిచేస్తోంది. సోమవారం సాయంత్రం 5 గంటల ప్రాంతంలో దుకాణంలో వెంకటలక్ష్మి మాత్రమే ఉంది. దీన్ని అదునుగా భావించిన యువకుడు దుకాణంలోకి ప్రవేశించాడు. వెంకటలక్ష్మితో గొడవపడ్డాడు. దీంతో తనను ఓ యువకుడు వేధిస్తున్నాడంటూ షాప్ యజమానికి వెంకటలక్ష్మి ఫోన్ చేసింది. యజమాని దుకాణానికి వచ్చేలోపే ఆ యువకుడు ఆమెను చంపేశాడు. రక్తపు మడుగులో ఉన్న యువతిని చూసిన యజమాని వెంటనే పోలీసులకు సమాచారం అందించారు.

హుటాహుటిన సంఘటనా స్థలానికి చేరుకున్న పోలీసులు ఆధారాలను సేకరించారు. సీసీటీవీ ఫుటేజీలను స్వాధీనం చేసుకుని పరిశీలిస్తున్నారు. వాటి ఆధారంగా నిందితుడిని పట్టుకునేందుకు ఆరు బృందాలుగా ఏర్పడి గాలింపు చేపట్టారు. కాగా, పదేళ్ల కిందట రావులపాలెం నుంచి వెంకటలక్ష్మి కుటుంబం హైదరాబాద్‌కు వలస వచ్చిందని పోలీసులు తెలిపారు. జువెలరీ షాపులో ఎలాంటి చోరీ జరగలేదని, వెంటలక్ష్మిని హత్యచేసి నిందితుడు పరారయ్యాడని వెల్లడించారు. ఈ హత్యకు ప్రేమ వ్యవహారమే కారణమై ఉంటుందని భావిస్తున్నారు. కూతురు హత్యకు గురైన విషయం తెలియడంతో షాపు వద్దకు చేరకున్న వెంకటలక్ష్మి తల్లి బోరున విలపించారు.