తెలంగాణ బడ్జెట్- గర్భిణి స్త్రీల సంక్షేమం

రెక్కాడితే కాని డొక్కాడని నిరుపేదలైన గర్బిణీలు 8వ నెలలో కూడా పనులకి వెళ్తుంటారు. లేదంటే ఇల్లు గడవడం కష్టం అవుతుందనేది వారి భయం, ఆందోళన. కానీ గర్బిణీలకి తగిన సమయంలో తగినంత విశ్రాంతి ఎంతో అవసరం. విశ్రాంతి లేకుండా పనులకి వెళ్లడం వల్ల, సరైన పోషకాహారం తీసుకోకపోవడం వల్ల వారి ఆరోగ్యం ప్రమాదంలో పడటమేకాకుండా, వారికి పుట్టబోయే చిన్నారులని కూడా అనారోగ్యంపాలు చేసే ప్రమాదం వుంది. అందుకే తెలంగాణలో నిరుపేదలైన మహిళలు గర్బం దాల్చిన తర్వాత పనులకి వెళ్లకుండా ఆ సమయంలో వారు కోల్పోయే ఆదాయాన్ని, ఆర్థిక సహాయం రూపంలో వారికి అందించేందుకు తెలంగాణ ప్రభుత్వం ముందుకొచ్చింది అని ప్రకటించారు తెలంగాణ ఆర్థిక శాఖ మంత్రి ఈటల రాజేందర్.

గర్బం దాల్చిన తర్వాత ప్రభుత్వ ఆస్పత్రిలో చికిత్స నిమిత్తం పేరు నమోదు చేయించుకున్నప్పుడు రూ.4 వేలు, కాన్పు పూర్తి చేసుకుని డిశ్చార్జ్ అయ్యే సమయంలో రూ. 4 వేలు, శిశువులకి పోలియో టీకాలు వేయించినప్పుడు మరో రూ. 4 వేలు ఆర్థిక సహాయం అందించనున్నట్టు మంత్రి ఈటల స్పష్టంచేశారు. మంత్రి చేసిన ప్రకటన ప్రకారం మొత్తం 3 విడతల్లో ప్రభుత్వం నుంచి గర్బిణీలకి రూ.12 వేల ఆర్థిక సహాయం అందనుంది. ఇదేకాకుండా, కాన్పులో ఒకవేళ ఆడ పిల్ల పుడితే, ఆ బాలింతకి రూ.1,000 అదనంగా అందజేయనున్నట్టు మంత్రి తన ప్రసంగంలో పేర్కొన్నారు.

బాలింతలకి స్పెషల్ కిట్:
ఈ మొత్తం ఆర్థిక సహాయం కాకుండా గర్బిణీలు డెలివరి అనంతరం వారికి ప్రభుత్వం పూర్తి ఉచితంగా 16 వస్తు, సామాగ్రి కలిగిన ఓ స్పెషల్ కిట్‌ని అందజేయనుంది తెలంగాణ సర్కార్. నవజాత శిశువులకి 3 నెలలు వచ్చే వరకు ఈ కిట్ ఉపయోగపడుతుంది.

ఈ కిట్ ద్వారా ఆట వస్తువులు, బట్టలు సహా శిశువు, బాలింతకి అవసరమైన అన్ని వస్తు, సామాగ్రిని సమకూర్చుతున్నామని ప్రకటించిన మంత్రి ఈటల.. ఈ పథకం కోసం రూ. 6,500 కోట్లు కేటాయిస్తున్నట్టు తెలిపారు. ఈ తరహా పథకాలతో తల్లి, శిశువు ఆరోగ్యం కాపాడటమేకాకుండా శిశు మరణాలని అదుపులోకి తీసుకురావచ్చని ప్రభత్వం భావిస్తున్నట్టు మంత్రి అభిప్రాయపడ్డారు.