Telangana Cabinet Meet: 'ప్రగతి నివేదన'కు ముందే రాష్ట్ర కేబినెట్ భేటీ!

ఆదివారం (సెప్టెంబరు 2) నిర్వహించనున్న 'ప్రగతి నివేదన' సభకు ముందే తెలంగాణ కేబినెట్ సమావేశం కానుంది. ఆదివారం మధ్యాహ్నం 1 గంటకు సీఎం అధికారిక నివాసం ప్రగతి భవన్‌లో కేసీఆర్ ఆధ్వర్యంలో కేబినెట్ సమావేశం ఉంటుందని ముఖ్యమంత్రి కార్యాలయం ఈ మేరకు ట్వీట్ చేసింది. అయితేప్రగతి నివేదన సభ ప్రారంభానికి ముందే కేబినెట్ భేటీ కానుండటం ప్రాధాన్యత సంతరించుకుంది. కేబినెట్‌ సమావేశంలో తీసుకునే నిర్ణయాలపై సర్వత్రా ఆసక్తి నెలకొంది. ప్రభుత్వం రద్దుపై ఊహాగానాలు నడుస్తున్న సమయంలోనే కేసీఆర్ కేబినెట్ సమావేశాన్ని ఏర్పాటు చేయడం చర్చనీయాంశమైంది.

ముందస్తు ఎన్నికల అంచనాలు తారస్థాయికి చేరడంతో తెలంగాణలో వివిధ వర్గాలకు వరాలు కురిపించేందుకు ముఖ్యమంత్రి కేసీఆర్‌ సిద్ధమవుతున్నారు. ఈ మేరకు ఆదివారం (సెప్టెంబరు 2) సాయంత్రం కొంగరకలాన్‌ ప్రగతి నివేదన సభ వేదికగా ఈ వరాలను సీఎం ప్రకటించే అవకాశం ఉంది.

కేబినెట్ సమావేశంలో వీటిపైనే చర్చ...
మంత్రివర్గ సమావేశంలో చర్చించే ఎజెండాలో వందకు పైగా అంశాలున్నట్లు తెలుస్తోంది. వాటిలోప్రధానమైన అంశాలివే...
* వేతన సవరణ కమిషన్‌ ఇచ్చిన మధ్యంతర నివేదికను మంత్రివర్గం ఆమోదించి మధ్యంతర భృతిపై కీలక ప్రకటన చేసే అవకాశాలున్నాయి.
* 31 కులాలకు సామాజిక భవనాలు కట్టడానికి వీలుగా 61.30 ఎకరాల స్థలాన్ని కేటాయించే ప్రతిపాదనలు సిద్ధం చేశారు.
* వృద్ధాప్య, వికలాంగ, వితంతువు వర్గాలకు పింఛన్‌ పెంపు, నిరుద్యోగ భృతిపై కూడా కీలక నిర్ణయం తీసుకుంటారని సమాచారం.
* కొత్త జోనల్‌ విధానంపై రాష్ట్రపతి ఉత్తర్వులు విడుదల కావడంతో నోటిఫికేషన్ల మీద చర్చిస్తారు.
* ఇప్పటికే నియామకాలకు పరిపాలనపరమైన అనుమతులు ఇచ్చినప్పటికీ భర్తీ ప్రక్రియ చోటు చేసుకోని నోటిఫికేషన్లు రద్దు చేయడానికి మంత్రివర్గం ఆమోదం తెలపనుంది.
* అర్చకుల పదవీ విరమణ వయసు 65 ఏళ్లకు పెంచే ప్రతిపాదనలతో పాటు.. వారికి ఒకటో తేదీనే వేతనం ఇవ్వడానికి వీలుగా తగిన చర్యలు తీసుకోవడానికి కేబినెట్ ఆమోదం తెలిపే అవకాశం ఉంది.