రోజాను ఆయన అలా అనడం కరెక్ట్ కాదన్న కేసీఆర్ ?

వైఎస్సార్సీపీ ఎమ్మెల్యే రోజా వ్యవహార శైలిపై విమర్శలు గుప్పిస్తూ ఇటీవల టీడీపీ సీనీయర్ నేత ముద్దుకృష్ణమ నాయుడు ఆమెపై చేసిన వ్యాఖ్యలపై తెలంగాణ సీఎం కేసీఆర్ సమక్షంలో అదే రోజు జరిగిన అధికార పార్టీ నేతల సమావేశంలో చర్చ జరిగినట్టు తెలుస్తోంది. రాజకీయ పార్టీల నేతలు చేసే ప్రకటనలు, ఆయా ప్రకటనలపై వచ్చే ప్రతిస్పందనల గురించి ఈ సమావేశంలో అనుకోకుండానే చర్చకు వచ్చాయట. ఈ సందర్భంగా ముందుగా కేసీఆరే స్వయంగా ముద్దు కృష్ణమనాయుడు చేసిన వ్యాఖ్యలు, ఆ వ్యాఖ్యలపై పత్రికల్లో వచ్చిన కథనాలని గురించి ప్రస్తావించినట్టు వినికిడి.

"ముద్దు కృష్ణమ నాయుడు తమ కన్నా సీనియర్‌ నేత. తాము అసెంబ్లీలో అడుగుపెట్టిన కొత్తలోనే ఆయన వద్ద కొన్ని పాఠాలు నేర్చుకున్న సందర్భాలున్నాయి అని అన్నారట కేసీఆర్. అటువంటి నాయకుడు ఇవాళ ఈ విధంగా ఒక మహిళా ఎమ్మెల్యే అయిన రోజా గురించి అలా మాట్లాడటం కరెక్టుగా అనిపించడంలేదు. ముద్దన్న చేసిన వ్యాఖ్యలు కూడా ఆయన స్థాయికి తగినవి కాదు. అందుకే మనం ఇలా చర్చించుకున్న విషయం ఎలాగోలా ముద్దన్నకు అర్థమయ్యేలా చెప్పండి" అని సూచించారట కేసీఆర్.

తెలంగాణ ఉప ముఖ్యమంత్రి, టీఆర్ఎస్‌లోకి రాకముందు వరకు టీడీపీ సీనియర్ నేతగా కొనసాగిన కడియం శ్రీహరి ఈ సమావేశం ముగిసిన వెంటనే స్వయంగా ముద్దు కృష్ణమ నాయుడుకు ఫోన్‌ చేసినట్టు సమాచారం. టీడీపీలో కొనసాగినప్పటి నుంచి ముద్దు కృష్టమనాయుడుతో వున్న అనుబంధం, చనువు కొద్దీ.. '' అన్నా, మీ గురించి ఇవాళ మా పార్టీ సమావేశంలో చర్చకొచ్చింది" అని చెప్పారట. రోజాపై మీరు చేసిన వ్యాఖ్యల్ని ప్రస్తావిస్తూ.. ' ఒక సీనియర్ నేతగా మీకు వున్న స్థాయిని తగ్గించుకోవద్దని మా సీఎం చెప్పమన్నారు" అని చెప్పారట కడియం శ్రీహరి.

తన గురించి తన పాత మిత్రులైన కేసీఆర్ లాంటి నేతలు మాట్లాడుకోవడంపై స్పందించిన ముద్దు కృష్ణమనాయుడు.. " రాజకీయాల్లో ఉన్నప్పుడు విమర్శలు, ప్రతి విమర్శలు సహజమే కదా అని అభిప్రాయపడుతూనే.. అయినా సరే తెలంగాణ సీఎం కేసీఆర్ తనపై చూపిన అభిమానానికి కృతజ్ఞతలు తెలిపారట. అదండీ సంగతి!