ప్రభుత్వం ఎవరికీ అన్యాయం జరగనివ్వదు: కేసీఆర్

కాంట్రాక్ట్ ఉద్యోగుల క్రమబద్దీకరణ విషయంలో ‘రూల్ ఆఫ్ రిజర్వేషన్’ పాటిస్తామని సీఎం కేసీఆర్ స్పష్టం చేశారు. శుక్రవారం (అక్టోబర్ 27) శాసనసభలో ప్రశ్నోత్తరాల సందర్భంగా సీఎం మాట్లాడారు. కాంట్రాక్టు సిబ్బందిని క్రమబద్దీకరిస్తామంటే.. విపక్షాలు కోర్టులకు వెళ్లి అడ్డుకునే ప్రయత్నం చేస్తున్నాయని ఆయన అన్నారు. శాశ్వత ఉద్యోగాల కోసం ఔట్‌సోర్సింగ్ తీసుకోవడం నిలిపేస్తున్నట్లు సీఎం ప్రకటించారు. ‘గత ప్రభుత్వాలు.. ఉద్యోగులు అర్ధాకలితో పని చేయడానికి కారణమయ్యాయి. అర్ధాకలితో ఎవరూ పని చేయొద్దని టీఆర్‌ఎస్ ప్రభుత్వం చర్యలు చేపట్టింది’ అని కేసీఆర్ తెలిపారు.

హోంగార్డుల సమస్యను త్వరలోనే పరిష్కారిస్తామని కేసీఆర్ చెప్పారు. వీరిని క్రమబద్దీకరించే క్రమంలో న్యాయపరమైన చిక్కులు వస్తున్నాయని వివరించారు. ఉద్యోగ కల్పన విషయంలో ప్రజలకు, నిరుద్యోగులకు అవగాహన కల్పించాల్సిన అవసరం ఎమ్మేల్యేలకు ఉందని ఆయన అన్నారు.

‘కేంద్ర, రాష్ట్ర ప్రభుత్వాలు అందరికీ ఉద్యోగాలను కల్పించలేదు. ప్రభుత్వ, ప్రైవేట్ రంగాల్లో ఉపాధి కల్పన లభించేలా చర్యలు తీసుకుంటాయి. ఉద్యోగ కల్పన విషయంలో కేంద్ర, రాష్ట్ర ప్రభుత్వాలను కొంతమంది కావాలని అభాసుపాలు చేస్తున్నారు’ అని కేసీఆర్ మండిపడ్డారు.

ఎస్సీ, ఎస్టీ, బీసీ, మైనార్టీల హక్కులకు భంగం కలగకుండా ప్రభుత్వం చర్యలు తీసుకుంటుందని, తెలంగాణ ప్రభుత్వం ఎవరికీ అన్యాయం జరగనివ్వదని కేసీఆర్ చెప్పారు. అనంతరం శాసనసభ, మండలి సోమవారానికి వాయిదా పడ్డాయి. శుక్రవారం ఉదయం 10 గంటలకు ప్రారంభమైన ఉభయ సభల్లో 11.30 గంటల వరకు ప్రశ్నోత్తరాలు కొనసాగాయి.