టి.కాంగ్రెస్ సంచలన నిర్ణయం.. మూకుమ్మడి రాజీనామాలు?

అసెంబ్లీ నుంచి తమ పార్టీ సభ్యుల్ని సస్పెండ్ చేయడంపై తెలంగాణ కాంగ్రెస్ పార్టీ తీవ్ర ఆగ్రహం వ్యక్తం చేసింది. స్పీకర్ తీరుకు నిరసనగా మూకుమ్మడి రాజీనామాలు చేయాలని టి.కాంగ్రెస్ నేతలు నిర్ణయించినట్లు తెలుస్తోంది. ఈ విషయమై ఏఐసీసీ అనుమతి కోసం టి.కాంగ్రెస్ వేచి చూస్తోందని సమాచారం. కేసీఆర్ సైకలాజికల్ గేమ్ ఆడుతున్నారంటూ ఆ పార్టీ నేతలు విమర్శలు గుప్పించారు. సభ నుంచి బయటకు పంపేయడంతో.. కాంగ్రెస్ పార్టీ ఎమ్మెల్సీలు శాసన మండలి ప్రవేశ ద్వారం దగ్గర ఆందోళన చేపట్టారు. అనంతరం జానారెడ్డి అధ్యక్షతన ఎమ్మెల్యేలు, ఎమ్మెల్సీల భేటీ అయ్యారు. విపక్ష నేతను సస్పెండ్ చేయడం తెలుగు రాష్ట్రాల అసెంబ్లీ చరిత్రలో ఇదే తొలిసారని కాంగ్రెస్ పార్టీ తెలిపింది.

సస్పెన్షన్ వేటు అనంతరం కాంగ్రెస్ ఎమ్మెల్సీ పొంగులేటి సుధాకర్ రెడ్డి మాట్లాడుతూ.. మమ్మల్ని ఏ రూల్ ప్రకారం సస్పెండ్ చేశారో చెప్పాలని డిమాండ్ చేశారు. తెలంగాణ ఇచ్చింది కాంగ్రెస్, శాసన మండలి కూడా కాంగ్రెస్ వల్లే ఏర్పాటయ్యిందనే విషయం గుర్తుంచుకోవాలన్నారు. అనుభవించు రాజా అంటూ కేసీఆర్ సర్కారు ఎంజాయ్ చేస్తోందని పొంగులేటి తీవ్ర స్థాయిలో విమర్శలు గుప్పించారు.

సోమవారం గవర్నర్ ప్రసంగం సందర్భంగా.. కాంగ్రెస్ సభ్యులు నిరసనలు, నినాదాలతో సభను హోరెత్తించారు. కోమటిరెడ్డి వెంకటరెడ్డి హెడ్‌ఫోన్‌ను గవర్నర్ మీదకు విసరగా.. అది మండలి చైర్మన్ స్వామి గౌడ్‌కు కంటికి తగిలింది. దీన్ని తెలంగాణ ప్రభుత్వం సీరియస్‌గా తీసుకుంది. స్పీకర్ 11 మంది కాంగ్రెస్ సభ్యులపై సస్పెన్షన్ వేటు వేశారు. కోమటిరెడ్డి వెంకటరెడ్డి, సంపత్‌‌ల శాసనసభ్యత్వాలను రద్దు చేశారు.