బతుకమ్మ పండగకు భారీ ఏర్పాట్లు..

బతుకమ్మ పండగకు భారీగా ఏర్పాట్లు చేస్తున్నారు. రాష్ట్రంలో సెప్టెంబర్ 20 నుంచి 28 వరకు తొమ్మిది రోజుల పాటు బతుకమ్మ జరుగనుంది. పండగ ఏర్పాట్లలో ఇబ్బందులు రాకుండా సమన్వయంతో పనిచేసి రాష్ట్ర సాంస్కృతిక ఉత్సవాన్ని ప్రపంచానికి చాటి చెప్పాలని ప్రభుత్వ ప్రధాన కార్యదర్శి ఎస్‌పీ సింగ్ అధికారులను ఆదేశించారు. సచివాలయంలో గురువారం (సెప్టెంబర్ 7) ఆయన వివిధ శాఖల ఉన్నతాధికారులతో సమీక్ష నిర్వహించారు. 26న ఎల్బీ స్టేడియంలో బతుకమ్మ ఉత్సవాన్ని 35000 పెద్ద ఎత్తున నిర్వహించడానికి భారీగా ఏర్పాట్లు చేస్తున్నారు. సద్దుల బతుకమ్మ సందర్భంగా 28న వివిధ ప్రాంతాల నుంచి వచ్చే మహిళలు.. బతుకమ్మలను హుస్సేన్‌సాగర్‌లో నిమజ్జనం చేస్తారని, ట్యాంక్‌బండ్‌పై తాత్కాలిక మరుగుదొడ్లు, రోడ్ల మరమ్మతులు, తాగునీటి సౌకర్యం కల్పించాలని సీఎస్ సూచించారు.

ట్రాఫిక్ ఇబ్బందులు తలెత్తకుండా చర్యలు తీసుకోవాలని నగర పోలీస్‌ కమిషనర్‌ను సీఎస్ ఆదేశించారు. రాష్ట్రవ్యాప్తంగా బతుకమ్మ పండగ నిర్వహణ ఏర్పాట్లపై త్వరలో కలెక్టర్లతో వీడియో కాన్ఫరెన్స్ కూడా నిర్వహించనున్నారు. బతుకమ్మ పండగ ఏర్పాట్ల ఖర్చుల నిమిత్తం 18లోగా జిల్లాలకు నిధులు అందజేస్తామని సీఎస్ తెలిపారు. 20వ తేదీలోగా బతుకమ్మ చీరెల పంపిణీ పూర్తి కావాలని అధికారులకు సీఎస్ స్పష్టం చేశారు.

బతుకమ్మ పండగ ప్రారంభ రోజైన సెప్టెంబర్ 20న సెలవు ఇవ్వాలని నిర్ణయించారు. సద్దుల బతుకమ్మ పండగ రోజైన 28తో పాటు 29, 30 తేదీలను దసరా సెలవుగా ప్రకటించారు.