సమంత సేవలు వినియోగించుకోనున్న టీ సర్కార్

రాష్ట్రంలో చేనేత రంగాన్ని పరిపుష్టం చేసి, నేతన్నలకి మరింత ఆత్మస్థైర్యం కల్పించేందుకు కృషి చేస్తోన్న తెలంగాణ ప్రభుత్వం త్వరలోనే సినీ నటి సమంత సేవల్ని కూడా అందుకోసం వినియోగించుకోనుంది. చేనేత ఉత్పత్తులకి ప్రచారం కల్పించడం కోసం సమంతతో తెలంగాణ స్టేట్ హ్యాండ్‌లూమ్స్ వీవర్స్ కోఆపరేటివ్ సొసైటీ (టెస్కో) బ్రాండ్ అంబాసిడర్‌గా ఒప్పందం కుదుర్చుకుంది తెలంగాణ ప్రభుత్వం.

గత కొంత కాలంగా వివిధ ప్రాంతాల్లోని నేతన్నలతో చర్చించి, వారి సమస్యలు అడిగి తెలుసుకుంటున్న సమంత, చేనేత ఉత్పత్తుల అమ్మకాలు పెరగడం కోసం తన అభిప్రాయాలు కూడా తమతో పంచుకోవడం జరిగిందని అన్నారు టెస్కో డైరెక్టర్ శైలజా రామయ్యర్.

చేనేత, జౌళి శాఖ అధికారులతో బుధవారం సమీక్షా సమావేశం నిర్వహించిన ఆ శాఖ మంత్రి కేటీఆర్.. చేనేత రంగం అభివృద్ధి కోసం కేటాయించిన రూ.1,200 కోట్లని నేతన్నలు సద్వినియోగం చేసుకోవాలని సూచించారు. చేనేత పరిశ్రమ రంగం సంక్షేమం కోసం త్వరలోనే ఓ కార్పొరేషన్ ఏర్పాటు చేయనున్నట్టు తెలిపిన కేటీఆర్.. సొసైటీల పనితీరుపై 15 రోజుల్లోగా ఓ సర్వే చేపట్టనున్నట్టు పేర్కొన్నారు.