హైదరాబాద్‌లో వరల్డ్ క్లాస్ ఫిలిం స్కూల్

హైదరాబాద్‌లో త్వరలోనే ప్రపంచస్థాయికి తగిన విధంగా ఓ ఫిలిం స్కూల్ ఏర్పాటు కానుందని తెలుస్తోంది. తెలంగాణ ఫిలిం డెవలప్‌మెంట్ కార్పొరేషన్‌కి కొత్తగా వచ్చిన చైర్మన్ రామ్మోహన్ రావు అధికారులతో మాట్లాడుతూ ఈ విషయాన్ని చెప్పినట్టు వార్తలు వెలువడుతున్నాయి. హైదరాబాద్ నగర శివార్లలో సుమారు 50 ఎకరాల స్థలంలో ఈ ఫిలిం ఇనిస్టిట్యూట్ ఏర్పాటు కానుందని, దీని కోసం స్థలం కేటాయింపు విషయంలో సీఎం కేసీఆర్ నిర్ణయం తీసుకోవడం ఒక్కటే మిగిలివుందని ఆయన అధికారులతో చెప్పినట్టు సమాచారం.

ఫిలిం స్కూల్‌తో పాటే ఓ ఫిలిం స్టూడియో, తెలంగాణ రాష్ట్ర వ్యాప్తంగా 100 మండల్లో మినీ థియేటర్ల నిర్మాణం చేపట్టేందుకు తెలంగాణ ప్రభుత్వం ప్రణాళికలు రచిస్తోందని రామ్మోహన్ రావు చెప్పారనేది ఆ వార్తా కథనాల సారాంశం. ఇప్పటికే భారతీయ చిత్ర పరిశ్రమకి చెందిన సినీ ప్రముఖులు పలు ప్రతిష్టాత్మకమైన చిత్రాల చిత్రీకరణ కోసం హైదరాబాద్‌లోని ఫిలిం స్టూడియోలు, చారిత్రాత్మక, పర్యాటక ప్రాంతాలని తమకి అనువైన ప్రాంతాలుగా ఎంచుకుంటున్నారు. ఈ క్రమలోనే హైదరాబాద్‌ని మరింత అభివృద్ధి చేసి సినీ నిర్మాణానికి సిటీని ఓ డెస్టినేషన్‌గా మార్చాలని ప్రభుత్వం యోచిస్తోందట.

వాస్తవానికి మిని థియేటర్ల నిర్మాణం అనేది ప్రభుత్వం ఎప్పటినుంచో చెబుతున్న అంశమే. కానీ హైదరాబాద్‌లో వరల్డ్ క్లాస్ ఫిలిం స్కూల్ ఏర్పాటు అనేదే కొత్తగా తెరపైకొస్తున్న అంశం. మున్ముందు తెలంగాణ ప్రభుత్వం ఈ విషయమై ఏం నిర్ణయం తీసుకుంటుందో చూడాలి మరి!