గ్రామ పంచాయతీల్లో ఆన్‌లైన్‌ సేవలు!

తెలంగాణలో గ్రామ పంచాయతీల దశ తిరగనుంది. ప్రభుత్వం తీసుకున్న నిర్ణయం వల్ల గ్రామపాలనలో పారదర్శకత కనిపించనుంది. గ్రామ పంచాయతీలకు రాజ్యాంగం ద్వారా అందిన అధికారాలను పకడ్బందీగా అమలుచేయాలనే ఉద్దేశంతో.. ప్రభుత్వం పంచాయతీ వ్యవస్థలో ఆన్‌లైన్‌ సేవలను ప్రవేశపెట్టనుంది. దీనిద్వారా గ్రామ పంచాయతీల్లో రికార్డుల నిర్వహణలో మోసాలను అడ్డకోవచ్చన్నది ప్రభుత్వ ఉద్దేశం. ఈ మేరకు పనులను ముమ్మరం చేసింది.

గ్రామ పంచాయతీలకు సంబంధించి దాదాపు 90 శాతం పంచాయతీల్లో రికార్డుల ప్రస్తావనే లేదు. దీనివల్ల గ్రామ పంచాయతీల్లో పాలన కుంటుపడుతోంది. పంచాయతీల పాలనా వ్యవహారాలు సవ్యంగా సాగాలంటే రికార్డుల నిర్వహణ చాలా ముఖ్యం. పంచాయతీల పరిధిలో అమలవుతున్న ప్రభుత్వ పథకాలు, అభివృద్ధి పనులు, పన్నుల నిర్ధారణతోపాటు.. పంచాయతీకి సంబంధించిన ఆస్తులను కాపాడటం, అక్రమాలకు చెక్ పెట్టడం వంటి బాధ్యతలు గ్రామ పంచాయతీలకు ఉంటాయి. అయితే వీటికి సంబంధించి పూర్తిస్థాయి రికార్డులు లేకపోవడం వల్ల అనేక పంచాయతీల్లో ఆదాయానికి సంబంధించిన లెక్కలు తారుమారవుతున్నాయి.

ఇకపై ఇలాంటి అక్రమాలకు తావులేకుండా రికార్డుల నిర్వహణను ఇంటర్నెట్ వ్యవస్థకు అనుసంధానం చేయాలని ప్రభుత్వం సంకల్పించింది. ఆన్‌లైన్ వ్యవస్థ అమల్లోకి వస్తే గ్రామపంచాయతీల పాలనలో పారదర్శకత ఉండి. అభివృద్ధికి ఆస్కారం ఏర్పడుతుంది. ప్రభుత్వం త్వరలోనే ఆన్‌లైన్ వ్యవస్థను అందుబాటులోకి తేనుంది.