అవయవదానంతో ఆరుగురి జీవితాల్లో వెలుగు.. నువ్వు 'రాజు'వయ్యా

అవయవదానం చాలా గొప్పది. మన ప్రాణాలు పోయినా.. మన శరీరంలోని కొన్ని భాగాలతో నలుగురి జీవితాల్లో వెలుగు నింపే అదృష్టం దక్కుతుంది. మన సమాజంలో మాత్రం ఈ గొప్ప పని గురించి అవగాహన లేక.. చాలామంది అదేదో తప్పైనట్లు తెగ ఫీలైపోతుంటారు. అలాంటి వారికి స్ఫూర్తి నింపుతూ అవయవదానానికి మందుకొస్తున్నారు కొందరు. సిద్ధిపేటకు చెందిన ఓ కుటుంబం కూడా అలాగే చేసింది. తమ ఇంట్లో మనిషి చనిపోయాడన్న బాధను దిగమింగి.. అవయవదానం చేసి ఆదర్శంగా నిలిచారు.

సిద్ధిపేట జిల్లా చిన్నకోడూరు మండలం అల్లిపూర్‌కు చెందిన రాజు అనే వ్యక్తి భార్య లాస్య, కుటుంంతో కలిసి ఉంటున్నాడు. ఈ నెల 11న సొంత పనిమీద బైక్‌పై కరీంనగర్‌కు బయల్దేరాడు. రోడ్డుపై వెళుతుండగా.. బైక్ అదుపుతప్పింది. రాజు కిందపడిపోవడంతో తలకు బలమైన గాయాలయ్యాయి. అతడ్ని వెంటనే స్థానిక ఆస్పత్రికి తరలించారు.. పరిస్థితి విషమించడంతో మెరుగైన వైద్యం కోసం సికింద్రాబాద్‌లోని యశోదా ఆస్పత్రికి తీసుకొచ్చారు. కాని ఈ నెల 14న బ్రెయిన్ డెడ్ అయినట్లు డాక్టర్లు తేల్చార.

అప్పుడే రాజు భార్య, కుటుంబ సభ్యులకు డాక్టర్లు, స్వచ్ఛంద సంస్థలు అవయవదానంపై అవగాహన కల్పించి.. రాజు అవయవదానానికి ఒప్పించారు. అతడి కాలెయం, రెండు మూత్ర పిండాలు, రెండు కార్నియాలు సేకరించారు. గుండెను జూబ్లీహిల్స్‌లోని అపోలో ఆస్పత్రికి తరలించారు. దీని కోసం సికింద్రాబాద్ నుంచి జూబ్లీహిల్స్ వరకు ట్రాఫిక్ పోలీసులు గ్రీన్ ఛానల్ ఏర్పాటు చేశారు. 15 నిమిషాల్లో గుండెను ఆస్పత్రికి తీసుకెళ్లి... ఓ రోగి ప్రాణాలను నిలబెట్టారు. మిగిలిన అవయవాలను వివిధ ఆస్పత్రుల్లో చికిత్సపొందుతున్న రోగులకు పంపించారు. ఓవైపు భర్త చనిపోయినా.. ఆ బాధను దిగమింగి.. అవయవదానానికి ముందుకొచ్చిన భార్యతో పాటూ కుటుంబ సభ్యుల్ని అందరూ ప్రశంసిస్తున్నారు.