ఢిల్లీ తరువాత టి. ఎమ్మెల్యేలకే అత్యధిక వేతనాలు

వేతనాలలో తెలంగాణశాసనసభ్యులు ఢిల్లీతో పోటీపడుతున్నారు. గత ఏడాది ఢిల్లీ ప్రభుత్వం ఒకేసారి వేతనాన్ని 400శాతం పెంచగా, తెలంగాణ ప్రభుత్వం దాదాపు 300శాతం పెంచి పెంపులో పోటీపడింది. ఢిల్లీలో ఎమ్మెల్యేలకు గరిష్టంగా రూ.2.50లక్షల వేతనం అలవెన్స్‌లతో కలుపుకుని అందుతుండగా, దానిని నమూనాగా తీసుకునే వసతుల కమిటీ రూ.3.50లక్షల వేతనం పెరిగిన ఖర్చులకు అనుగుణంగా ఇవ్వాలని కోరింది. అయితే ప్రభుత్వం రూ.2.30లక్షలు అలవెన్సులతో కలుపుకుని గరిష్టంగా ఇచ్చేందుకు బిల్లు ప్రతిపాదించింది. ప్రస్తుతం దేశంలో ఢిల్లీ ఎమ్మెల్యేలు అత్యధిక వేతనం పొందుతుండగా, తర్వాత వరుసలో తెలంగాణ ఎమ్మెల్యేలు నిలవనున్నారు.
ముఖ్యమంత్రి, మంత్రులు, స్పీకర్‌, ప్రతిపక్షనేత, చీఫ్‌ విప్‌, విప్‌, శాసనమండలి చైర్మన్‌లకు ప్రస్తుతం రూ.95వేల వేతనం ఉండగా, దీనిని రూ.2.80 లక్షలకు పెంచుతూ ప్రతిపాదించారు. ఎమ్మెల్యేలు, ఎమ్మెల్సీలకు గరిష్టంగా రూ.90వేలు ఉండగా.. దీనిని రూ.2.30లక్షలకు పెంచాలని నిర్ణయించి బిల్లులో పెట్టారు. కొత్తవేతనాల ప్రకారం హెచ్‌ఆర్‌ ఏ రూ.25వేల నుండి 50వేలకు పెరగనుంది. బేసిక్‌ రూ.20వేలకు పెరగనుంది. స్పెషల్‌ కార్‌ సెక్యూరిటీ అలవెన్స్‌ కింద రూ.25వేలు ఇవ్వనున్నారు. నియోజకవర్గ అలవెన్స్‌ను రూ.83 వేలకు పెంచుతూ ప్రతిపాదించారు.