బాన పొట్టల పోలీసులకు ప్రత్యేక శిక్షణ!

మనకు కనిపించే చాలా మంది సివిల్ పోలీసులకు బాన పొట్టలుండటం చూస్తూనే ఉంటాం. వాస్తవానికి వారు విధుల్లో చేరిన తరవాత వ్యాయామానికి అంత ప్రాధాన్యత ఉండకపోవడంతో బొజ్జలు పెంచడంతోపాటు బరువు కూడా పెరిగిపోతున్నారు. అయితే ఏపీఎస్పీ, అక్టోపస్, గ్రేహౌండ్స్ లాంటి విభాగాల్లో ఈ విధంగా ఉండదు. వారికి ఎప్పటికప్పుడు శిక్షణ ఇస్తుంటారు కాబట్టి వాళ్లు చాలా ఫిట్‌గా ఉంటారు. అయితే సివిల్ పోలీసుల ఫిట్‌నెస్ ఏమంత బాగాలేదని తెలంగాణ పోలీస్ ఉన్నతాధికారులు గుర్తించారు. దీంతో సిబ్బంది ఆరోగ్యం, శరీర దారుఢ్యంపై దృష్టి సారించారు. దానికోసం అడిషనల్‌ డీజీ స్థాయి అధికారితో హోంగార్డు నుంచి డీఎస్పీ స్థాయి వరకు ఫిట్‌గా ఉంచేలా శిక్షణ ఇచ్చేందుకు ప్రణాళిక తయారు చేయించారు.

రాష్ట్రంలో సుమారు 20వేల మందికిపైగా పోలీసులకు బొజ్జలు, వేలాది మంది వంద కిలోలకు పైగా బరువు ఉన్నట్లు పోలీస్ శాఖ పరిశోధనలో తేలింది. ఉమ్మడి రాష్ట్రంలోనే సమస్య తీవ్రతను గుర్తించిన అధికారులు పరిస్థితిలో మార్పు తెచ్చేందుకు కొన్ని విధానాల్ని రూపొందించారు. ఆ సమయంలో రాష్ట్రం విడిపోవడంతో ఈ విధానాలు మరుగున పడిపోయాయి. ఇప్పుడు వాటిని మళ్లీ బయటికి తీసేందుకు నిర్ణయించారు. సిబ్బంది అనారోగ్య సమస్యలు, చిన్న సమస్యలకే డిప్రెషన్‌కు గురై ఆత్మహత్యలు చేసుకుంటుండటంతో ఫిట్‌నెస్‌పై ఉన్నతాధికారులు మరోసారి దృష్టి సారించారు.

తమ పరిధిలో ఉన్న అధికారులు, సిబ్బంది ఆరోగ్యం, ఐపీసీ, సీఆర్‌పీసీ సెక్షన్లపై అవగాహన కల్పించే విషయంలో కమిషనర్లు, జిల్లాల ఎస్పీలు చర్యలు తీసుకోవాలని ఉన్నతాధికారులు ఆదేశించారు. ఇదిలా ఉండగా.. సిబ్బంది పదోన్నతుల్లో స్టేట్‌ కేడర్‌ విధానాన్ని త్వరలో అమల్లోకి తెస్తున్నారు. దీనికి ప్రభుత్వ కూడా ఆమోదం తెలిపింది. ఇకనుంచి పదోన్నతుల్లో సీనియారిటీతో పాటు పనితీరు, శరీర దారుఢ్యం, ఐపీసీ, సీఆర్‌పీసీ సెక్షన్లపై సిబ్బందికి ఎంత అవగాహన ఉందనే విషయాలూ కీలకంగా మారనున్నట్లు సమాచారం.