మిగతా వాళ్లకు 3 వారాలు.. తెలంగాణ పోలీసులకు 4 రోజులు

తెలంగాణ పోలీసులు పాస్‌పోర్ట్ పోలీస్ వెరిఫికేషన్లో అగ్రస్థానంలో నిలిచారు. 2017-18కిగానూ రెండు అవార్డులను సొంతం చేసుకున్నారు. పాస్‌పోర్ట్ వెరిఫికేషన్ కోసం జాతీయ సగటు 21 రోజులుగా ఉంటే.. తెలంగాణ పోలీసులు మాత్రం నాలుగు రోజుల్లోనే ఆ పని పూర్తి చేస్తున్నారని హైదరాబాద్ ప్రాంతీయ పాస్‌పోర్ట్ ఆఫీసర్ విష్ణువర్ధన్ రెడ్డి తెలిపారు. హైదరాబాద్ పాస్‌పోర్ట్ కేంద్రం ఏటా 5 లక్షల మందికిపైగా పాస్‌పోర్టులను జారీ చేస్తోంది.

జూన్ 26న విదేశీ వ్యవహారాల శాఖ మంత్రి సుష్మా స్వరాజ్ అవార్డులను ప్రదానం చేస్తారు. పాస్‌పోర్ట్ వెరిఫికేషన్ ప్రక్రియను సులభతరం చేయడం కోసం దరఖాస్తు చేసుకున్నవారికి నేర చరిత్ర ఉంటేనే పోలీసులు వెరిఫై చేసేలా నిబంధనలను సరళతరం చేసింది. పాస్‌పోర్ట్ కోసం దరఖాస్తు చేసుకున్న వారి ఇంటికెళ్లి తనిఖీ చేసే అవసరం లేదని విష్ణు వర్ధన్ రెడ్డి తెలిపారు.
పాస్‌పోర్ట్ తనిఖీలో నంబర్ 1గా నిలిచిన తెలంగాణ పోలీసులు, హోం మంత్రి నాయిని నర్సింహారెడ్డికి మంత్రి కేటీఆర్ అభినందనలు తెలిపారు.