Vijayawada Bus Fire: గరుడ బస్సులో మంటలు.. తృటిలో తప్పిన ప్రమాదం

విజయవాడ సమీపంలో తెలంగాణ ఆర్టీసీ బస్సుకు పెను ప్రమాదం తృటిలో తప్పింది. గురువారం విజయవాడ నుంచి హైదరాబాద్ బయల్దేరిన బస్సులో.. కృష్ణా జిల్లా ఇబ్రహీంపట్నం మండలం జూపూడి దగ్గర మంటలు చెలరేగాయి. మంటలు రావడాన్ని గమనించిన బస్సు డ్రైవర్ వెంటనే అప్రమత్తమై ప్రయాణికుల్ని కిందకు దించేశాడు. సమాచారం అందుకున్న ఫైర్ సిబ్బంది మంటల్ని ఆర్పేశారు. ఎలక్ట్రికల్ వైరింగ్‌లో షార్ట్ సర్క్యూట్‌తో మంటలు చెలరేగినట్లు నిర్థారించారు.. ప్రమాదంలో బస్సు వెనుకబాగం మొత్తం కాలిపోయింది. ప్రమాదం జరిగిన సమయంలో బస్సులో 50మంది ప్రయాణికులు ఉన్నారు. డ్రైవర్ అప్రమత్తమై వెంటనే వారిని దించేయడంతో పెద్ద ప్రమాదమే తప్పిందని.. అందరూ ఊపిరి పీల్చుకున్నారు. ప్రయాణికుల్ని మరో బస్సులో హైదరాబాద్‌కు పంపారు.