జాతీయ జెండాకు అవమానం.. తిరగేసి ఎగరేసిన టీడీపీ ఎమ్మెల్యే

భారతదేశ 71వ స్వాతంత్య్ర దినోత్సవ వేడుకల వేళ ఆంధ్రప్రదేశ్‌లోని గుంటూరులో జాతీయ జెండాకు అవమానం జరిగింది. గుంటూరు జిల్లా పెదకూరపాడు మండల పరిషత్ అభివృద్ధి కార్యాలయంలో జరిగిన స్వాతంత్య్ర దినోత్సవ వేడుకల్లో పాల్గొనేందుకు ఎమ్మెల్యే కొమ్మాలపాటి శ్రీధర్ విచ్చేశారు. ఈ సందర్బంగా పతాకావిష్కరణ కార్యక్రమంలో పాల్గొన్న ఆయన జాతీయ జెండాను తిరగేసి ఎగురవేశారు. జాతీయ పతాకం తిరగబడి ఉండటంపై, పలువురు ఆగ్రహాన్ని వ్యక్తం చేశారు. జెండాను ఎగురవేసిన తరువాత జరిగిన పొరపాటును గ్రహించిన ఎంపీడీఓ ఆఫీస్ సిబ్బంది జెండాను సరిచేశారు. అయితే కార్యాలయంలో సిబ్బంది నిర్లక్ష్యంతో ఎమ్మెల్యే జెండాను తలకిందులుగా ఎగురవేశారని కారకులైన వారిపై చర్య తీసుకుంటామని అధికారులు వెల్లడించారు.


జాతీయ జెండాను అవమానిస్తే.. చట్టంలో ఎలాంటి శిక్షలు ఉన్నాయో ఓసారి చూద్దాం..

* జాతీయ పతాకంపై ఏవిధమైన రాతలు రాయరాదు, చెక్కరాదు బుద్ధిపూర్వకంగా జాతీయ పతాకం నేలను తాకేలా చేయరాదు, నీట ముంచరాదు జాతీయ పతాకాన్ని బుద్ధిపూర్వకంగానే కాదు, పొరపాటుగా తలకిందులుగా ఎగుర వేయరాదు జాతీయ పతాకాన్ని అవమానించే లేదా అవహేళన చేసే వ్యాఖ్యలు చేసిన వారు కూడా శిక్షార్హులే.

* దీనిని సంబంధించి ‘జాతీయ పతాక గౌరవ పరిపరక్షణ చట్టం 1971’ ను అనుసరించి బహిరంగ ప్రదేశాల్లోగానీ, ప్రజలు వీక్షించటానికి అవకాశముండే ప్రదేశాల్లో కానీ, మరేదైనా ప్రదేశాల్లో కానీ జాతీయ పతాకాన్ని లేదా భారత రాజ్యాంగాన్ని తగులబెట్టిగా, చింపివేసినా, ధ్వంసం చేసినా, మాటల ద్వారా, చేతల ద్వారా, ఏవైనా ఇతర హావభావాల ద్వారా కించపరిచినా కానీ నేరం.

*అటువంటి చర్యలు పవిత్రమైన జాతీయ పతాకాన్ని, రాజ్యాంగాన్ని అవమానపరచినట్లుగా పరిగణింపబడి శిక్షార్హమైన నేరాలవుతాయి.

* ఈ చట్టాన్ని అనుసరించి... ప్రభుత్వం నిర్దేశించిన రోజుల్లో తప్ప మిగిలిన రోజుల్లో ప్రభుత్వ భవనాలపై జాతీయ పతాకాన్ని అవనతం చేయరాదు.

* జాతీయ పతాకాన్ని అవమాన పరిచినట్లైతే మూడు సంవత్సరాలు జైలు శిక్ష, జాతీయ గీతాన్ని పాడకుండా నిరోధించినా, గలాభా చేసినా కూడా మూడేళ్ల వరకు జైలు, జరిమానా లేక రెండూ విధింపబడతాయి.

* ఒకవేళ జాతీయ పతాకం పాడయినట్లయితే దానిని చాటుగా తగులబెట్టాలి. అంతేకానీ, దానిని ఎగుర వేయడం కానీ, ఇతర విధాలుగా కానీ ఉపయోగించడం కూడా నేరమే.

*ఈ నియమాలకు, నిబంధనలకు పెద్ద పెద్ద రాజకీయ నాయకులు, మంత్రులు, అధికారులు కూడా అతీతులు కారు. వారికి కూడా శిక్షతప్పదు.