ఉగ్రకాల్పుల్లో సిక్కోలు జవాన్ వీరమరణం

జమ్మూ కశ్మీర్‌లో కుల్గామ్ జిల్లాలో బుధవారం ఉదయం ఉగ్రవాదులు, సైన్యానికి మధ్య జరిగిన ఎదురు కాల్పుల్లో ఆంధ్రప్రదేశ్‌కు చెందిన జవాన్ అమరుడయ్యాడు. శ్రీకాకుళం జిల్లా పాతపట్నం మండలం ఏఎస్ కవిటి గ్రామానికి చెందిన సాద గుణకరరావు ఉగ్ర తూటాలకు బలయ్యాడు. ఈ ఘటనలో మరో ముగ్గురు పౌరులు ప్రాణాలు కోల్పోగా, ఇద్దరు జవాన్లు, 20 మంది పౌరులు గాయపడిన విషయం తెలిసిందే. దక్షిణ కశ్మీర్‌లోని ఖుద్వానీలో లష్కరే తొయిబా ఉగ్రవాదులు దాక్కున్నట్టు సమాచారం అందుకున్న భద్రతా బలగాలు ఆ ప్రాంతంలో తనిఖీలు చేపట్టాయి. ఉగ్రవాదులు ఉన్న ఇంటిని సైన్యం చుట్టిముట్టడంతో ముష్కరులు కాల్పులకు తెగబడ్డారు. దీంతో అప్రమత్తమైన భద్రతా సిబ్బంది ఎదురు కాల్పులు ప్రారంభించాయి. ఉగ్రవాదుల కాల్పుల్లో ముగ్గురు జవాన్లు గాయపడ్డారు. తీవ్రంగా గాయపడిన జవాన్ గుణకరరావును చికిత్స కోసం ఆసుపత్రికి తరలించగా అప్పటికే మృతిచెందినట్టు వైద్యులు వెల్లడించారు.

వ్యవసాయ కుటుంబానికి చెందిన గుణకరరావు ముగ్గురు ఆడపిల్లల తర్వాత లేకలేక పుట్టిన కుమారుడు. ఐదేళ్ల కిందట ఆర్మీలో చేరిన ఆయన, తన ముగ్గురు అక్కలకు పెళ్లిళ్లు చేయడంలో తండ్రికి సహకరించాడు. త్వరలోనే తాను కూడా వివాహం చేసుకుంటానని తల్లిదండ్రులకు మాటిచ్చాడు. గుణకరరావు మృతి వార్త తెలియడంతో ఆయన స్వగ్రామం అత్తిసూరి కవిటిలో విషాద ఛాయలు అలముకున్నాయి. రెండు నెలల కిందటే సెలవుపై ఇంటికి వచ్చిన గుణకరరావుకు త్వరలోనే పెళ్లి చేయాలని కుటుంబ సభ్యులు నిర్ణయించారు. అంతలోనే అతడి మరణవార్త ఆ కుటుంబంలో విషాదం నింపింది. గుణకరరావు మృతదేహాన్ని స్వగ్రామానికి పంపించేందుకు ఏర్పాటు చేసినట్టు అధికారులు తెలిపారు. అధికార లాంఛనాలతో వీర జవాన్‌కు అంత్యక్రియలు నిర్వహించనున్నట్టు తెలియజేశారు. కుమారుడి మరణవార్త విని తల్లిదండ్రులు జయమ్మ, మల్లేశ్వరరావులు హతాశులయ్యారు.