తెలుగు రాష్ట్రాల మధ్య ముగిసిన జల జగడం

ఏపీ, తెలంగాణ మధ్య ఏర్పడిన నీటి వివాదం ముగిసింది. ఈ గొడవపై కృష్ణా రివర్ బోర్డు జోక్యం చేసుకొని పరిష్కారం చూపింది. ఏపీ డిమాండ్ ప్రకారం మరో 5 రోజుల పాటూ రోజుకు 2వేల క్యూసెక్కుల నీటిని విడుదల చేయాలని ఆదేశించినట్లు తెలుస్తోంది. నీటి విడుదలపై ఇరు రాష్ట్రాల మధ్య మళ్లీ వివాదం ఏర్పడింది. సాగర్ కుడి కాలువకు తెలంగాణ అధికారులు నీటిని నిలిపివేశారు.దీంతో తమ వాటా పూర్తవ్వకుండా నీటిని నిలిపివేయడంపై ఏపీ అభ్యంతరం వ్యక్తం చేసింది. కుడి కాలువకు వెంటనే నీటిని విడుదల చేయాలని ఏపీ అధికారులు డిమాండ్ చేశారు.

సాగర్ నుంచి ఆంధ్రకు 10.5 టీఎంసీల నీటిని కృష్ణా బోర్డు కేటాయించింది, అయితే ఇప్పటి వరకు 10.2 టీఎంసీల నీరు విడుదలవగా... మరో 0.3 టీఎంసీలు నీరు విడుదల కావాల్సి ఉంది. అయితే ఆ నీటిని విడుదల చేయకుండానే తెలంగాణ కుడి కాల్వకు నీటిని నిలిపి వేయడం ఏంటని ఏపీ ప్రశ్నించింది. ముందు జాగ్రత్తగా డ్యామ్ దగ్గర ఇరు రాష్ట్రాల పోలీసులు భారీ సంఖ్యలో మోహరించారు. అయితే చివరికి కృష్ణా రివర్ బోర్డు జోక్యం చేసుకొని పరిష్కారం చూపించడంతో వివాదం సద్ధుమణిగింది.