థర్డ్‌పార్టీ ఇన్సూరెన్స్ తప్పనిసరి.. లేదంటే తిప్పలే!

మీ వాహనానికి థర్డ్ పార్టీ ఇన్సూరెన్స్ వుందా ? లేకపోతే ఇక తీసుకోవాల్సిందే. ఇప్పటివరకు వేరు.. ఇకపై వేరు. ఇకపై థర్డ్ పార్టీ ఇన్సూరెన్స్ లేకపోతే మీ వాహనాన్ని స్వాధీనం చేసుకుంటాం అని అంటున్నారు సైబరాబాద్ పోలీసు కమిషనర్ సందీప్ శాండిల్య. అవును, ఇండియన్ మోటార్ వెహికల్ యాక్ట్ 1988 సెక్షన్ 146 ప్రకారం రోడ్లపైకి వచ్చే అన్ని వాహనాలకు థర్డ్‌పార్టీ ఇన్సూరెన్స్ తప్పనిసరిగా ఉండాల్సిందేనని సైబరాబాద్ పోలీస్ కమిషనర్ సందీప్ శాండిల్య స్పష్టంచేశారు. ఈమేరకు శనివారం ఆయన అధికారికంగా ఉత్తర్వులు జారీ చేశారు.

రోడ్డు భద్రత విషయంలో ఇన్సూరెన్స్ లేని వాహనాలను స్వాధీనం చేసుకోవాలని, వాహన యజమాని ఒరిజినల్ ఇన్సూరెన్స్ సర్టిఫికెట్‌ని తీసుకుని చూపించిన తర్వేత ఆ వాహనాన్ని వారికి అప్పగించాలని రోడ్డు భద్రతపై సుప్రీం కోర్టు వేసిన కమిటీ సూచించిన విషయాన్ని సీపీ ఈ సందర్భంగా గుర్తుచేశారు.

ఈరోజు నుంచి 15 రోజులలోపు వాహనదారులంతా తమ వాహనాలకు ఇన్సూరెన్స్ చేయించుకోవాలని, లేని పక్షంలో ఆ తర్వాత తాము చేపట్టబోయే స్పెషల్ డ్రైవ్‌లలో ఇన్సూరెన్స్ లేని వాహనాలని స్వాధీనం చేసుకోవడం జరుగుతుందని సైబరాబాద్ సీపీ సందీప్ శాండిల్య తెలిపారు.