ఆ చిన్నారి కళ్లల్లో కన్నీటికి బదులు రక్తం!

హైదరాబాద్‌కు చెందిన అహనా అనే మూడేళ్ల చిన్నారి విచిత్రమైన వ్యాధితో బాధపడుతోంది. ఆమె కళ్ల నుంచి కన్నీరుకు బదులు.. రక్తం కారుతోంది. దీంతో, ఆమె తల్లిదండ్రులు చికిత్సకు సాయం అందించాలని తెలంగాణ ముఖ్యమంత్రి కేసీఆర్, ప్రధాని నరేంద్ర మోదీలను కోరుతున్నారు. అహనా తండ్రి మహ్మద్ అఫ్జల్ మాట్లాడుతూ.. ‘‘నా కూతురికి వచ్చిన ఈ సమస్య పూర్తిగా తగ్గుతుందో లేదో వైద్యులు చెప్పడం లేదు. అందుకే, ఆమె చికిత్స కోసం సీఎం కేసీఆర్, ప్రధాని మోదీల సాయం కోరుతున్నాం’’ అని తెలిపారు.

16 నెలల కిందట ఈ చిన్నారికి ముక్కు, చెవులు నుంచి రక్తం కారేదని, ఇప్పుడు కళ్ల నుంచి కూడా కారుతుందని పేర్కొన్నారు. ఒక్కోసారి మర్మాంగాల నుంచి కూడా రక్తం కారుతోందని, కొన్ని సందర్భాల్లో అపస్మారక స్థితిలోకి జారుకుంటుందని తెలిపారు.

అహనాకు వచ్చిన సమస్యపై వైద్యులు స్పందిస్తూ.. ఇది చాలా అరుదాగా వచ్చే ‘హెమటిడ్రోసిస్’ (Hematidrosis) సమస్య అని తెలిపారు. స్వేదగ్రంథులకు చెందిన కాపిల్లరీ రక్తనాళాలు చీలిపోవడం వల్ల రక్తం బయటకు వస్తున్నట్లు పేర్కొన్నారు. ప్రస్తుతం ఈ సమస్య ప్రాణాంతకం కాకున్నా, వెంటనే చికిత్స చేయకపోతే ప్రమాదమేనని తెలుపుతున్నారు. ఆమె ఎదుర్కొంటున్న ఈ దయనీయ పరిస్థిని ప్రభుత్వం గుర్తించి, తగిన చికిత్స అందిస్తే.. ఆ చిన్నారి ప్రాణాలు నిలబడతాయి.