పొలంలో పిడుగు.. తల్లీ, కొడుకు, కూతురు మృతి, తండ్రి పరిస్థితి విషమం

పిడుగుపాటుకు ఒకే కుటుంబానికి చెందిన ముగ్గురు దుర్మరణం పాలైన ఘటన వికారాబాద్ జిల్లాలో చోటుచేసుకుంది. పొలం దగ్గర పనులు చేస్తున్న కుటుంబాన్ని పిడుగు రూపంలో మృత్యువు కబళించింది. పిడుగుపాటుకు తల్లి, కొడుకు, కూతురు అక్కడికక్కడే మృతి చెందగా.. తీవ్రంగా గాయపడిన తండ్రి పరిస్థితి విషమంగా ఉంది. వికారాబాద్ జిల్లాలోని థరూర్ మండలం రాజాపూర్ గ్రామంలో సోమవారం (మే 20) మధ్యాహ్నం ఈ విషాదం చోటుచేసుకుంది..

పొలం వద్ద పనులు చేస్తుండగా పిడుగు పడటంతో మహిళ ఖాజాబీ (39), కూతురు తబుస్సుం (15), కుమారుడు అక్రమ్ (12) అక్కడికక్కడే చెందారు. తీవ్ర గాయాలపాలైన ఫక్రుద్దీన్‌ను స్థానికులు ఆసుపత్రికి తరలించి చికిత్స అందిస్తున్నారు. ఒకే కుటుంబంలో ముగ్గురు దుర్మరణం పాలవడంతో గ్రామంలో తీవ్ర విషాదం అలుముకుంది.