హైదరాబాద్‌లో 144 సెక్షన్.. ర్యాలీలు, సభలపై నిషేదం

అయోధ్యలోని వివాదాస్పద బాబ్రీ మసీదును కూల్చివేసి 25 ఏళ్లు పూర్తి కావచ్చింది. ఈ సందర్భంగా బాబ్రీ మసీదును కూల్చివేత రోజైన డిసెంబర్ 6వ తేదీని ‘బ్లాక్ డే’గా పరిగణిస్తున్న సంగతి తెలిసిందే. డిసెంబర్ 6 వచ్చిందంటే పోలీసులు అలెర్ట్ అయిపోతారు. ఎక్కడా ఎలాంటి అవాంఛనీయ సంఘటనలు చోటుచేసుకోకుండా జాగ్రత్తలు తీసుకుంటారు. ఈ ఏడాది కూడా అదే జరుగుతోంది. హైదరాబాద్ నగరంలో రేపటి నుంచి 48 గంటల పాటు 144 సెక్షన్‌ అమలు చేస్తున్నట్లు నగర పోలీస్‌ కమిషనర్‌ వీవీ శ్రీనివాసరావు ప్రకటించారు.

బ్లాక్‌ డే సందర్భంగా నగరంలో నిషేదాజ్ఞలు విధిస్తూ సోమవారం ఉత్తర్వులు జారీ చేశారు. డిసెంబర్ 6న ర్యాలీలు, ప్రదర్శనలు, పబ్లిక్‌ మీటింగ్‌లు, సమావేశాలను రద్దు చేస్తున్నట్టు పేర్కొన్నారు. 144 సెక్షన్ అమ‌లులో ఉన్న ప్రాంతాల్లో న‌లుగురు లేదా అంత‌కుమించి ఒకేచోట గుమికూడి ఉండ‌టం నిషేధమని చెప్పారు. సభల్లో ఉద్రేక‌పూరితంగా మాట్లాడటం, ప్రజలను రెచ్చగొట్టేలా ప్రసంగాలు చేస్తు కఠిన చర్యలు తప్పవన్నారు. స‌భ‌లు, స‌మావేశాల నిర్వహణకు కూడా ముంద‌స్తు అనుమతి తప్పనిసరిగా తీసుకోవాల‌న్నారు.

ఈ ఉత్తర్వులకు పెడచెవిని పెట్టి విరుద్దంగా వ్యవహరిస్తే క్రిమినల్ కేసులు పెడతామని హెచ్చరించారు. బుధవారం (డిసెంబర్ 6) ఉదయం 6.00 గంటల నుంచి గురువారం (7వ తేదీ) ఉదయం 6.00 గంటల వరకు ఈ నిషేదాజ్ఞలు అమలులో ఉంటాయని వెల్లడించారు. మరోవైపు పాతబస్తీలోని పలు సమస్యాత్మక ప్రాంతాల్లో హై అలర్ట్‌ ప్రకటించినట్లు దక్షిణ మండల డీసీపీ సత్యనారాయణ తెలిపారు. అత్యంత సమస్యాత్మక ప్రాంతాల్లో పోలీసులు పికెట్‌ నిర్వహిస్తున్నామన్నారు.