బాబు పోరాటానికి టాలీవుడ్ పూర్తి మద్దతు

ప్రత్యేక హోదా, విభజన హామీల అమలుపై కేంద్రానికి వ్యతిరేకంగా ఏపీ ముఖ్యమంత్రి చంద్రబాబు నాయుడు చేస్తోన్న పోరాటానికి సినీ రంగం నుంచి కూడా మద్దతు లభించింది. పలువురు సినీ ప్రముఖులు తమ సంపూర్ణ మద్దతు ప్రకటించారు. అమరావతిలో శుక్రవారం నాడు ఏపీ సీఎం చంద్రబాబును కలిసిన టాలీవుడ్ దర్శక నిర్మాతలు.. విభజన హామీల అమలు కోసం చేస్తున్న పోరాటానికి బాసటగా ఉంటామని ప్రకటించారు. ప్రత్యేకహోదా సాధన కోసం తమవంతు కృషి చేస్తామని హామీ ఇచ్చారు. అలాగే కేంద్రం వైఖరికి నిరసనగా అఖిల సంఘాలు ఇచ్చిన పిలుపు మేరకు తాము కూడా నల్ల బ్యాడ్జీలతో ఏప్రిల్ 6 వరకు నిరసన తెలుపుతామని అన్నారు. సీఎంను కలిసిన వారిలో కె. రాఘవేంద్ర రావు, అశ్వనీదత్‌, కేఎల్‌ నారాయణ, కేఎస్‌ రామారావు, జెమిని కిరణ్‌, కె. వెంకటేశ్వరరావు తదితరులు ఉన్నారు.

ఏపీకి ప్రత్యేక హోదాపై హీరో మోహన్‌బాబు, శివాజీ, నిఖిల్ సిద్దార్థ, మంచు మనోజ్, సంపూర్ణేష్ బాబు, తమ్మారెడ్డి భరద్వాజ, కొరటాల శివ, మా అసోసియేషన్ సైతం ఇప్పటికే తమ మద్దతు ప్రకటించిన విషయం తెలిసిందే. కొద్ది రోజుల కిందట టీడీపీ ఎమ్మెల్సీ బాబూ రాజేంద్రప్రసాద్ మాట్లాడుతూ.. రాష్ట్రానికి జరిగిన అన్యాయంపై తెలుగు సినీ పరిశ్రమ మాత్రం ఏమీ పట్టనట్టు వ్యవహరిస్తూ సమస్యకు దూరంగా ఉంటోందని వ్యాఖ్యానించడం, దీనికి టాలీవుడ్ కూడా ఘాటుగా స్పందించడం తెలిసిందే. శివాజీరాజా, తమ్మారెడ్డి భరద్వాజ్, పోసాని లాంటి వాళ్లు రాజేంద్రప్రసాద్ వ్యాఖ్యలకు స్ట్రాంగ్ రిప్లయ్ కూడా ఇచ్చారు.