ముగిసిన సుబ్బరాజు విచారణ... కీలక సమాచారం వెల్లడి

డ్రగ్స్ దందా కేసులో నటుడు సుబ్బరాజు ఈ రోజు సిట్ ముందు హాజరయ్యాడు. ఉదయం 10:15 గంటలకు మొదలైన విచారణ కాసేపటి కిందట ముగిసింది. సుమారు ఆరు గంటల పాటు సుబ్బరాజును సిట్ అధికారులు విచారించారు. తమ దగ్గరున్న సాక్ష్యాలను చూపుతూ, అధికారులు ప్రశ్నించారు. అతడు చెప్పిన సమాధానాలను రికార్డ్ చేసి, ఎప్పుడు పిలిస్తే అప్పుడు విచారణకు హాజరు కావాలని ఆదేశించారు. విచారణ సందర్భంగా సుబ్బరాజు కీలక విషయాలను వెల్లడించినట్లు సమాచారం. నాలుగో రోజు విచారణకు హీరో తరుణ్ రేపు హాజరుకానున్నాడు.

టాలీవుడ్ డ్ర‌గ్స్‌ కేసులో మూడోరోజు సిట్‌ విచారణ కొనసాగుతోందని తెలంగాణ రాష్ట్ర ఎక్సైజ్ శాఖ‌ క‌మిష‌న‌ర్ చంద్ర‌వ‌ద‌న్ తెలిపారు. సుబ్బ‌రాజు విచార‌ణ కొన‌సాగుతున్న అబ్కారీ కార్యాలయం వ‌ద్ద ఆయ‌న మీడియాతో మాట్లాడారు. సుబ్బరాజు ఇచ్చిన స్టేట్‌మెంట్‌ను రికార్డు చేశామ‌ని అన్నారు. ఈ రోజు ఓ ముఖ్య‌మైన స‌మాచారం వ‌స్తుందని తాము భావిస్తున్నామని తెలిపారు. సుబ్బ‌రాజును ప్ర‌శ్నిస్తుంటే ప‌లు కీలక విష‌యాలు బ‌య‌ట‌ప‌డ్డాయని పేర్కొన్నారు.

అంతేకాదు విచారణకు హాజరయ్యే వారి నుంచి ఏ అంశాలపై సమాచారం రాబట్టాలనే విధంగా ప్ర‌శ్నావ‌ళిని ముందుగానే సిద్ధం చేసుకుని అడుగుతున్నామ‌ని చంద్రవదన్ తెలియజేశారు. నోటీసులు అందుకున్న వారంతా కార్యాల‌యానికి వ‌చ్చి తాము అడిగే ప్ర‌శ్న‌ల‌కు స‌మాధానం చెబుతున్నార‌ని అన్నారు. వారి నుంచి పూర్తి స‌హ‌కారం ల‌భిస్తోందని తెలిపారు. డ్ర‌గ్స్ విష‌యంలో సుదీర్ఘంగా విచార‌ణ చేప‌ట్టాల్సి ఉంద‌ని చెప్పారు.