అమ్మా టమాటా.. ఏంటీ మంట!

తెలుగు రాష్ట్రాల్లో టమాటా ధర ఠారెత్తిపోతోంది. గత నెలలో కిలో రూ. 15 నుంచి రూ.20లుగా ఉన్న టమాటా ధర ఇప్పుడు దానికి మూడు నాలుగు రెట్లయింది. దిగుబడి తగ్గిపోయి సరఫరా సరిగా లేకపోవడంతో బహిరంగ మార్కెట్‌లో కిలో టమాట రూ.100 నుంచి రూ.120 వరకు ధర పలుకుతోంది. హైదరాబాద్‌లోని మెహిదీపట్నం రైతుబజార్‌లో శనివారం కిలో టమాట ధర రూ.71గా నిర్ణయించారు. శుక్రవారం కిలో ధర రూ.55 ఉండగా, ఈనెల 3న రూ.59, జులై ఒకటిన రూ.39గా ఉంది.

వారం వ్యవధిలో రైతుబజార్‌లో టమాట ధర రెండింతలు పెరిగింది. ఇక విశాఖపట్నం, విజయవాడ, తిరుపతి, వరంగల్, మహబూబ్‌నగర్ వంటి ప్రధాన నగరాలు, పట్టణాల్లో కూడా టమాటా మంట పుట్టిస్తోంది. టమాటా లేనిదే తెలుగింట కూరలేదంటే అతిశయోక్తి కాదు. ఇప్పుడు దీని ధర చికెన్ ధరకు సమానంగా ఉండటంతో వాటిని కొనేందుకు సామాన్యులు వెనకాడుతున్నారు. నిత్యవసరంగా ఉపయోగించే టమాటా ధర ఇంత ఘోరంగా పెరిగిపోవడంతో సామాన్యులు కొనే ధైర్యం చేయలేకపోతున్నారు. అయితే రానున్న రెండు మూడు రోజుల్లో టమాటా ధర తగ్గే అవకాశముందని మార్కెటింగ్ శాఖ అధికారులు చెబుతున్నారు.