Hyderabad: నేడు హైదరాబాద్‌లో ట్రాఫిక్ ఆంక్షలు

నేడు హైదరాబాద్ నగరంలో ట్రాఫిక్ ఆంక్షలు ఉంటాయని పోలీసులు వెల్లడించారు. తెలంగాణ శాసనసభ ప్రొటెం స్పీకర్‌గా ఎంఐఎం ఎమ్మెల్యే ముంతాజ్ అహ్మద్ ఖాన్ బుధవారం సాయంత్రం 5 గంటలకు ప్రమాణం చేయనున్నారు. రాజ్‌భవన్‌లో చార్మినార్ ఎమ్మెల్యే ముంతాజ్ అహ్మద్ ఖాన్ చేత గవర్నర్ నరసింహన్ ప్రమాణ స్వీకారం చేయించనున్నారు.

ఈ కార్యక్రమం నేపథ్యంలో సాయంత్రం 4 గంటల నుంచి 6 గంటల వరకు రెండు గంటల పాటు రాజ్‌భవన్ వైపు వెళ్లే దారులన్నీ మూసివేయనున్నారు. ఈ మేరకు అటువైపు వెళ్లకుండా అన్ని వాహనాలను డైవర్ట్ చేయనున్నారు. ముందుగానే తెలియజేశామని, నగర ప్రజలు ఈ మార్గంలో ట్రాఫిక్ ఆంక్షలు పాటించి తమకు సహకరించాలని నగర ట్రాఫిక్ పోలీసులు విజ్ఞప్తి చేశారు.

కాగా, గురువారం (జనవరి 17న) నుంచి తెలంగాణ అసెంబ్లీ సమావేశాలు ప్రారంభం కానున్నాయి. ప్రొటెం స్పీకర్ ముంతాజ్ అహ్మద్ ఖాన్ 119 మంది ఎమ్మెల్యేలతో (నామినేటెడ్ సభ్యుడితో కలిపి) ప్రమాణ స్వీకారం చేయిస్తారు. ఈ నెల 17 నుంచి 20 వరకు నాలుగు రోజుల పాటు సమావేశాలు నిర్వహిస్తారు.