కేసీఆర్‌తో భేటీ.. సుమన్‌కు జైకొట్టిన నల్లాల ఓదేలు

చెన్నూరు అసెంబ్లీ నియోజకవర్గ టిక్కెట్ కేటాయింపు విషయంలో టీఆర్‌ఎస్ పార్టీలో తలెత్తిన వివాదానికి ఆ పార్టీ అధినేత కేసీఆర్ తెరదించారు. కేసీఆర్‌తో చెన్నూరు మాజీ ఎమ్మెల్యే నల్లాల ఓదేలు గురువారం భేటీ అయ్యారు. చెన్నూరు టికెట్‌ ఏంపీ బాల్క సుమన్‌కు కేటాయించటంతో ఓదేలు అనుచరులు తీవ్ర అసంతృప్తితో ఉన్న విషయం తెలిసిందే. బుధవారం బాల్క సుమన్‌ ఎన్నికల ప్రచారం ప్రారంభం సందర్భంగా ఓదేలు అనుచరుడు గట్టయ్య పెట్రోల్‌ పోసుకుని ఆత్మహత్యకు యత్నించిన ఘటనలో 16 మంది గాయపడిన విషయం తెలిసిందే. ఈ నేపథ్యంలో ... అధినేత కేసీఆర్‌తో ఓదేలు సమావేశమై చర్చించారు. అనంతరం ఆయన మీడియాతో మాట్లాడుతూ... పార్టీలో సముచిత స్థానం కల్పిస్తామని కేసీఆర్‌ హామీ ఇచ్చినట్లు చెప్పారు.

అధినేత మాటే తనకు శిరోధార్యమని.. పార్టీ అభ్యర్థి గెలుపు కోసం కార్యకర్తలు కృషి చేయాలని ఓదేలు పిలుపునిచ్చారు. పార్టీ అభ్యర్థి గెలిస్తేనే కేసీఆర్‌ ముఖ్యమంత్రి అవుతారని కార్యకర్తలకు ఆయన సూచించారు. మరోవైపు గట్టయ్య ఆత్మహత్యాయత్నం ఘటనలో గాయపడినవారిలో ముగ్గురి పరిస్థితి విషమంగా ఉంది. ఈ ఘటనలో ఓ వీడియో జర్నలిస్ట్ సైతం గాయపడటంతో ఆయనను హైదరాబాద్‌కు తరలించి చికిత్స అందజేస్తున్నారు.

టికెట్ విషయంలో రాజీ పడేదే లేదని.. సుమన్‌పై ఎంత దాకైనా పోరాడుతానని రెండు రోజుల కిందట ఓదేలు వ్యాఖ్యానించారు. అసలు సుమన్ చరిత్రేంటో త్వరలోనే టీఆర్ఎస్ అధినేత ముందు పెడతానని బహిరంగంగా ప్రకటించారు. అలాగే తనకు టికెట్ కేటాయించలేదనే మనస్తాపంతో ఓదేలు మంగళవారం స్వీయ గృహ నిర్బంధం విధించుకున్నారు. మందమర్రి‌లోని తన నివాసంలోనే భార్య భాగ్యలక్ష్మి, కుమారుడు సందీప్‌, కుమార్తె జ్యోత్స్న, తల్లి పోసవ్వతోపాటు ఇంట్లోనే ఉండిపోయి నిరసన తెలిపారు. మరి అంతలోనే అధినేత కేసీఆర్‌తో భేటీ అనంతరం మాజీ ఎమ్మెల్యే రాజీకి రావడం విశేషం.