Telangana Elections: టీఆర్ఎస్ సభ.. అందరి చూపు నిజామాబాద్ వైపు!

తొమ్మిది నెలల ముందే అసెంబ్లీని రద్దు చేసిన కేసీఆర్.. ముందస్తు ఎన్నికలకు తెరతీశారు. శాసన సభ రద్దుకు గవర్నర్ గ్రీన్ సిగ్నల్ ఇచ్చిన వెంటనే.. 105 మంది అభ్యర్థులతో జాబితా ప్రకటించి ప్రతిపక్షాలను ఆశ్చర్యంలో ముంచెత్తారు. ఆ తర్వాత సిద్దిపేట జిల్లా హుస్నాబాద్‌లో తొలి ప్రజా ఆశీర్వాద బహిరంగసభతో ఎన్నికల ప్రచారానికి శ్రీకారం చుట్టారు. ప్రతిపక్షాలు మహాకూటమి ఏర్పాటులో భాగంగా సీట్ల పంపకం విషయమై చర్చిస్తుండగానే.. గులాబీ పార్టీ ప్రచారాన్ని ముమ్మరం చేసింది.

నిజామాబాద్‌ కేంద్రంగా నేడు (బుధవారం) భారీ బహిరంగ సభ నిర్వహిస్తోంది. గిరిరాజ్ కాలేజీ మైదానం వేదికగా జరుగుతున్న ఈ సభకు పార్టీ శ్రేణులు భారీ స్థాయిలో ఏర్పాట్లు చేశాయి. ఈ సభ తర్వాత గురువారం నల్లగొండలో, శుక్రవారం వనపర్తిలో టీఆర్ఎస్ సభలు నిర్వహిస్తుంది. తర్వాతి రోజుల్లో వరంగల్, ఖమ్మం జిల్లాల్లో జరగనున్న ప్రజాఆశీర్వాద సభల్లో గులాబీ బాస్ పాల్గొంటారు.

నిజామాబాద్ సభ ఏర్పాట్లను ఎంపీ కవిత వారం రోజులపాటు దగ్గరుండి పర్యవేక్షించారు. మధ్యాహ్నం రెండుగంటలకు ప్రారంభమయ్యే ఈ సభకు ఏర్పాట్లు పూర్తయ్యాయి. హెలికాప్టర్ ద్వారా కేసీఆర్ నేరుగా సభాస్థలికి చేరుకునేలా ఏర్పాట్లు చేశారు. ప్రజా ఆశీర్వాద సభ కోసం భారీగా జనాలను తరలించడానికి పార్టీ నేతలు కృషి చేస్తున్నారు. రెండు లక్షల మందికిపైగా ఈ సభకు హాజరయ్యే అవకాశం ఉంది.

సీఎం కేసీఆర్ పాల్గొనే ఉమ్మడి నిజామాబాద్ జిల్లా భారీ బహిరంగసభకు పెద్ద ఎత్తున తరలిరావాలని నిజామాబాద్ పార్లమెంట్ సభ్యురాలు కల్వకుంట్ల కవిత పిలుపునిచ్చారు. నిన్న నిజామాబాద్‌లోని తన క్యాంపు కార్యాలయంలో ఏర్పాటుచేసిన మీడియా సమావేశంలో కవిత మాట్లాడుతూ.. ముఖ్యం గా ఆడబిడ్డలు, రైతన్నలు కదలాలని అన్నారు. మన ప్రభుత్వ హయాంలో, మన తెలంగాణలో జరుగుతున్న అభివృద్ధిని ప్రత్యక్షంగా వివరించడానికి, ఉమ్మడి నిజామాబాద్ జిల్లాలో ఇంతవరకు ఏం చేశామో.. భవిష్యత్తులో ఏం చేయబోతున్నామో చెప్పేందుకు ముఖ్యమంత్రి వస్తున్నారని ఆమె తెలిపారు.