ఎస్టీ, ముస్లింల కోటాకు అసెంబ్లీ ఆమోదం

గిరిజనులు, ముస్లింల రిజర్వేషన్ల బిల్లుకు తెలంగాణ అసెంబ్లీ ఏకగ్రీవంగా ఆమోదం తెలిపింది. ముస్లిం రిజర్వేషన్లను తాము వ్యతిరేకిస్తున్నామని అసెంబ్లీలో నిరసన తెలిపిన బీజేపీ సభ్యులను అంతకు ముందే స్పీకర్ సభ నుంచి సస్పెండ్ చేశారు.

తెలంగాణ అసెంబ్లీ ఆదివారం ప్రత్యేకంగా సమావేశమై ఈ బిల్లుకు ఆమోదం తెలిపింది.
దీని ప్రకారం..గిరిజనులకు 6 నుంచి 10 శాతం రిజర్వేషన్ల పెంపు, బీసీ-ఈలకు 4 నుంచి 12 శాతం రిజర్వేషన్లు దక్కనున్నాయి.
అంతకు ముందు ఈ బిల్లుపై సుధీర్ఘ చర్చ జరిగింది.
ఈ సందర్భంగా సీఎం కేసీఆర్ మాట్లాడుతూ.. రిజర్వేషన్ల పెంపు బిల్లుకు మద్దతు తెలిపినందుకు సభ్యులందరికీ కృతజ్ఞతలు తెలిపారు. ఈ బిల్లు విషయంలో విజయం సాధిస్తామన్న నమ్మకం తనకు ఉందన్నారు. విపక్షాలు అడిగిన ప్రశ్నలకు సీఎం సమాధానమిచ్చారు. రిజర్వేషన్ల పెంపు విషయంలో ఎవరికీ అనుమానం అవసరం లేదన్నారు. ముస్లింలకు కేటాయిన్నవి మతపరమైన రిజర్వేషన్లు కాదు.. వెనుకబడిన తరగతుల రిజర్వేషన్ల బిల్లు అని సీఎం వివరించారు.

50శాతానికి మించిన రిజర్వేషన్ల సాధన కోసం కేంద్రంతో పోరాడతామని, అవసరమైతే సుప్రీంకోర్టులో కూడా న్యాయపరంగా కొట్లాడతామని ఆయన స్పష్టం చేశారు.