విజిట్ తెలంగాణ: ఫర్ ఆల్ రీజన్స్.. ఎట్ ఆల్ సీజన్స్

తెలంగాణలోని దర్శనీయ ప్రాంతాల గురించి వివరిస్తూ రాష్ట్ర పర్యాటక శాఖ రూపొందించిన వీడియోను ఐటీ శాఖ మంత్రి కేటీఆర్ ట్విట్టర్ ద్వారా షేర్ చేశారు. ఈ వీడియోలో తెలంగాణ గొప్పదనాన్ని ఇంగ్లిష్‌ భాషలో వివరించడం గమనార్హం. అంతర్జాతీయంగా ఖ్యాతి గడిస్తున్న తెలంగాణకు జాతీయ, అంతర్జాతీయ పర్యాటకులను మరింత ఎక్కువ మందిని ఆకర్షించే లక్ష్యంతో ఈ వీడియో రూపొందించారు. రాష్ట్రంలోని పర్యాటక ప్రాంతాల ప్రత్యేకతను వీడియోలో కళ్లకు కట్టేలా చూపించారు. ఈ ప్రాంతంలోని చారిత్రాత్మక కట్టడాలు, ప్రముఖ చెరువులు, జలపాతాలతో పాటు ఇక్కడి ప్రకృతి అందాలను అద్భుతంగా తెరకెక్కించారు.

తెలంగాణ ప్రాంత ప్రజల సంస్కృతి, సంప్రదాయాల గురించి వివరిస్తూ వీడియో రూపొందించారు. తెలంగాణకే ప్రత్యేకమైన బతుకమ్మ పండగ వైభవాన్ని అద్భుతంగా చెపెట్టారు. ఇక గోల్కొండ కోట, చార్మినార్ అందాలతో పాటు కాకతీయుల కళావైభవం, లక్నవరం చెరువు తదితరాలను వీడియోలో చూడవచ్చు. ‘తెలంగాణను సందర్శించండి.. అన్ని కారణాలతో.. అన్ని కాలాల్లో..’ అంటూ వీడియో చివర్లో చెప్పడం ఆకట్టుకుంటోంది.
Glorious Telangana! @tstourism pic.twitter.com/kDZnWPQFPt — KTR (@KTRTRS) December 2, 2017