ఎమ్మెల్యే పదవికి శుక్రవారమే రాజీనామా చేసిన రేవంత్!

శనివారం తెలుగుదేశం పార్టీ సాధారణ సభ్యత్వానికి రాజీనామా చేసిన రేవంత్‌ రెడ్డి తన ఎమ్మెల్యే పదవిని కూడా వదులుకున్నారు. శాసనసభ సభ్యత్వానికి అక్టోబరు 27 నే రాజీనామా చేశారు. తన రాజీనామా లేఖను స్పీకర్‌కు పంపారు. తన రాజీనామా వెనుకు ఎలాంటి ఒత్తిడి లేదని, తన ఇష్ట ప్రకారమే చేస్తున్నట్లు స్పీకర్‌కు రాసిన లేఖలో పేర్కొన్నారు. తెలంగాణ‌లో టీడీపీ ఉండి తీరాలని రేవంత్ రెడ్డి అన్నారు. టీడీపీకి, ఆ పార్టీ ప‌ద‌వుల‌కి రాజీనామా చేస్తూ ఈ రోజు ఆంధ్ర‌ప్ర‌దేశ్ ముఖ్య‌మంత్రి చంద్ర‌బాబు నాయుడికి రేవంత్ రెడ్డి లేఖ‌ స‌మ‌ర్పించిన విష‌యం తెలిసిందే. ఆ లేఖ‌లో ఏపీ, తెలంగాణ‌లోని ప‌లువురు టీడీపీ నేత‌లపై రేవంత్ రెడ్డి ఆగ్ర‌హం వ్య‌క్తం చేశారు. కొంత‌మంది నేత‌లు వ్య‌వ‌హ‌రిస్తోన్న తీరు బాగోలేద‌ని అన్నారు.

త‌మ పార్టీ అధ్యక్షుడు చంద్ర‌బాబుపై త‌న‌కు ఎంతో గౌర‌వం ఉందని పేర్కొన్నారు. భ‌విష్య‌త్తులోనూ ఆయ‌న‌పై గౌర‌వం ఇలాగే కొన‌సాగుతుంద‌ని స్పష్టం చేశారు. తెలంగాణ‌లో టీడీపీ కార్య‌క‌ర్త‌లు అసంతృప్తితో ఉన్నారని లేఖ‌లో పేర్కొన్నారు. కేసీఆర్‌పై త‌న పోరాటం కొన‌సాగుతుంద‌ని చెప్పారు. ప్రజలతో ఉండటం నా నైజం, ప్రజల కోసం పోరాడటమే నా తత్వం, ప్రజా సంక్షేమమే నా గమ్యమని రేవంత్ తన రాజీనామా లేఖలో పేర్కొన్నారు. నా పోరాటాలకు అన్న ఎన్టీఆర్ కూడా స్ఫూర్తే... తెలంగాణ సమాజంపై ఆయనది చెరగని ముద్ర... సమాజమే దేవాలయం... ప్రజలే దేవుళ్లు అన్న నందమూరి ఆలోచనకు మించిన సిద్ధాంతం లేదు. సమాజంలో ఆయన నింపివెళ్లిన ఆవేశం ఇంకా ఇంకిపోలేదు.. విప్లవాత్మక సంస్కరణలతో ప్రజల గుండెల్లో శాశ్వతంగా నిలిచిపోయారని రేవంత్ కొనియాడారు.