ఎస్సై ఆత్మహత్య ఘటనలో ట్విస్ట్!

సిద్ధిపేట జిల్లా కుకునూరుపల్లి ఎస్‌ఐ ప్రభాకర్‌ రెడ్డి ఆత్మహత్య కేసు మరో మలుపు తిరిగింది. హైదరాబాద్‌‌లోని ఫిల్మ్‌ నగర్‌లో బ్యూటీషియన్‌ శిరీష మృతికి ఈ ఎస్‌ఐతో సంబంధం ఉన్నట్లు ఆరోపణలు వస్తున్నాయి. కొంత కాలంగా ప్రభాకర్‌ రెడ్డికి శిరీషతో పరిచయం ఉన్నట్లు తెలుస్తోంది. గత ఆదివారం (జూన్ 11) ప్రభాకర్‌ రెడ్డి మద్యం మత్తులో శిరీషను లైంగికంగా వేధించినట్లు ఆరోపణలు వస్తున్నాయి. కాగా, ఆమె ఆత్మహత్య చేసుకుందా లేక ఎవరైనా హత్య చేశారా అనే కోణంలోనూ పోలీసులు విచారణ చేపట్టారు. బుధవారం ఉదయం శిరీష ఆత్మహత్య వ్యవహారం బయటకు రావడంతో ఎస్‌ఐ తన సర్వీస్‌ రివాల్వర్‌తో కాల్చుకుని ఆత్మహత్యకు పాల్పడ్డట్లు తెలుస్తోంది. మరోవైపు ఎస్‌ఐ ప్రభాకర్‌రెడ్డి ఆత్మహత్యను తీవ్రంగా పరిగణించిన డీజీపీ అనురాగ్ శర్మ.. ఈ ఘటనపై సమగ్ర విచారణ జరిపి నివేదిక ఇవ్వాలని అదనపు డీజీ గోపి కృష్ణను ఆదేశించారు. డీజీపీ ఉన్నతాధికారులతో అత్యవసరంగా భేటీ అయ్యారు.

శ్రీకృష్ణానగర్‌లో నివసించే అరుమిల్లి విజయలక్ష్మి అలియాస్ శిరీష (28) ఫిలింనగర్‌లోని ఆర్‌జే ఫొటోగ్రఫీలో బ్యుటీషియన్‌గానే కాకుండా హెచ్‌ఆర్‌గా పనిచేస్తోంది. మంగళవారం అర్ధరాత్రి ఆమె తన కార్యాలయంలో ఫ్యాన్‌కు ఉరేసుకొని ఆత్మహత్య చేసుకుంది. తన భార్య ఆత్యహత్య చేసుకునేంత పిరికిది కాదని, మరణం వెనుక అనుమానాలు ఉన్నాయని ఆమె భర్త సతీష్‌ చంద్ర పోలీసులకు పిర్యాదు చేశాడు. ఈ దంపతులకు 12 ఏళ్ల కూతురు కూడా ఉంది.

శిరీష ఆత్మహత్యకు పాల్పడటానికి ముందు రాజీవ్‌, అతడి స్నేహితుడు శ్రావణ్‌‌తో కలసి బయటకు వెళ్లి వచ్చినట్లు పోలీసుల విచారణలో తేలింది. ముగ్గురూ కలిసి మద్యం సేవించినట్లు తెలుస్తోంది. శిరీషతో వీరికి వివాదాలున్నాయని, మంగళవారం రాత్రి పొద్దు పోయే వరకూ వీరి మధ్య వాగ్వాదం జరిగినట్లు తెలుస్తోంది.

ఆర్‌జే ఫొటోగ్రఫీ సంస్థ యజమాని వల్లభనేని రాజీవ్‌ను శిరీష ఆత్మహత్య ఉదంతంపై ప్రశ్నించగా.. భిన్నమైన సమాధానాలు చెప్పినట్టు సమాచారం. రాత్రి 2 గంటల ప్రాంతంలో శిరీష ఫ్యాన్‌కు ఉరేసుకుందని, తానే చున్నీని కత్తిరించి మంచం మీద పడుకోబెట్టానని ఒకసారి.. బాత్రూంలో ఆత్మహత్య చేసుకుందని మరోసారి చెప్పడంతో అనుమానాలు బలపడ్డాయి. రాజీవ్‌తో పాటు అతడి స్నేహితుడిని కూడా పోలీసులు విచారిస్తున్నారు.